"Xhisiela" e "Babale", Rama: Je futur thellë miku im. Basha: Të tund krimi
Kryeministri: Nëse Balla ka qenë në komisarit, të arrestohet Audiopërgjimi, kreu i PD- së: Nxirr ekspertizën e videos
Tritoli në shtëpinë e gjyshit e xhaxhit të Xhisiela Malokut rindezi dje debatet mes kryeministrit dhe kreut të opozitës. Në një reagim të tij, në mbledhjen e grupit parlamentar të PS- së, kryeministri Edi Rama mori në mbrojtje kreun e grupit socialist, Taulant Balla. "Mbrëmë natën, vajzës së kthyer në ' mish për topat' e kësaj politike të ulët i është hedhur lëndë plasëse në shtëpi. Kush është i interesuar të krijojë në publik idenë se vajza është nën trysnin e një terrori psikologjik? Ne?! Jo! Nuk ka mendje normale, madje edhe peshqit e liqenit artificial e kuptojnë që për këtë kanë interes vetëm ata që e dhunuan publikisht për ditë e ditë të tëra dhe askush tjetër", u shpreh dje Rama. Duke iu referuar kërkesës së PD- së për të përjashtuar Ballën nga delegacioni parlamentar i Stabilizim- Asociimit, Rama iu drejtua njërës prej firmëtarëve, ish- ministres së tij të Integrimit, Kaljda Gjosha, duke i thënë: "E dashur Klajda, qetësohu! Taulanti është ai që ka qenë kur bashkëpunoje me të si drejtues i delegacionit. Ai nuk e ka bërë kurrë atë që e ka tronditur kaq shumë Monikën dhe për pasojë edhe ty, sa të bashkosh zërin në atë kujë drejtuar Parlamentit Europian. Materialet filmike të Komisariatit të Krujës në ditën e ngjarjes të denoncuar nga heroi i ' Babale 2'- shit janë në prokurori. Por si deputete, thellësisht e shqetësuar nga mundësia e qëndrimit në një delegacion me një kriminel të armatosur dhe të maskuar si kryetar delegacioni, ti mund t'i
drejtohesh policisë me kërkesën për të parë ato materiale". "Nëse do gjesh gjëkundi në ato filmime Taulant Ballën, apo qoftë edhe vetë heroin, të cilin Taulanti e paska kërcënuar me pistoletë në kokë, unë do votoj bashkë me ty, jo për të hequr Taulantin nga drejtimi i delegacionit për Brukselin, por për t'i hapur rrugë arrestimit të tij, pasi ta kem kallëzuar po unë dhe ti në prokurori", tha më tej Rama. Duke folur për opozitën, Rama u shpreh: "Hiq çizmen dhe vrap me gjuhën jashtë do të vazhdojnë përditë këta që kemi kusurin të kemi përballë. Lehje sa gdhihet deri kur ngryset dhe ' të dalë, ku të dalë motra'. Kjo është opozita. Sot, djali i një deputeti është
në burg. Më vjen shumë keq për Rrahmanin, se po kalon një moment tejet të vështirë, pranë shtratit të spitalit ku e shoqja po lufton me vdekjen dhe natyrisht, edhe si baba, me një djalë që është aty ku e meriton të jetë", u shpreh më tej Rama.
"BABALJA"
E duke e lidhur me audiopërgjimin, që sipas ekspertizës së britanikëve doli që ishte montazh, Rama u shpreh se, "vëllai i ministrit në atë audiopërgjim është një aktor. Më saktë, një mjeran i joshur për ta luajtur atë rol në këmbim të parave. Unë i bëj thirrje prokurorisë që t'i çojë deri në fund hetimet e ' Babale 1' pa u kompleksuar nga kërcënimet dhe sulmet e dëshpëruara të PD- së", theksoi Rama. Kryeministri tha se do të çojë shumë shpejt në Kuvend paketën antishpifje, jo për të mbyllur rrugët e lirisë së shprehjes, por që secili t'i dalë për zot asaj që thotë. Nga ana e tij, kreu i opozitës, Lulzim Basha u shpreh: "Shqipëria nuk ka më kryeministër. Shqiptarët nuk kanë më qeveri që mendon e punon për ta dhe hallet e tyre. Në vend të sigurisë, punësimit e mirëqenies, tani e tutje shqiptarët do të kenë vetëm telenovela. Ndërkohë qeveria, policia dhe prokuroria punojnë çdo ditë për t'u garantuar sigurinë, qetësinë dhe paratë kriminelëve. Sepse Rama mendon dhe vepron vetëm për të mbrojtur kriminelët. Ndaj çirret e betohet nga mëngjesi në darkë për të mbrojtur Tahirin, Xhafajan, Ballën, Rrajen, Çyrbjen, Gjushin, e kriminelët e lidhur me ta. Edi Rama nuk është më kryeministër, por vetëm një dordolec që krimi e tund përditë në publik për të kërcënuar dhe trembur shqiptarët", tha Basha. "Por shqiptarët nuk tremben. Unë as trembem dhe as shantazhohem, sepse nuk jam peng i krimit. Sepse kurrë nuk më ka lidhur asgjë me kriminelët, sepse sado t'i mbrojë Rama kriminelët dhe mbrojtësit e tyre, ata të gjithë do të përfundojnë atje ku e kanë vendin. Kreu i PD- së, Basha kërkoi nga Rama të nxjerrë ekspertizën e audiopërgjimit. Por më pas, Rama reagoi sërish duke i thënë: "Lëri reagimet trimërore si ato të kënduarat natën për të larguar gogolët. Ty s'të ka lidhur asgjë me kriminelët? Ti je artist. Tani tregoju shqiptarëve kush të lidhi me poetin Babale dhe kush e çoi nga zyra jote tek gazetari. Ah, mos harro kamerat e Krujës para se të flesh prapë".