I shet makinat më shtrenjtë se sa i blen, gjyqtarja e Korçës rrezikon detyrën
KPK: Bëri deklarim të rremë, fshehu pasurinë
TIRANË - Kryetarja e Gjykatës së Apelit Civil në Korçë, Entela Prifti rrezikon shkarkimin nga detyra për shkak të pasurisë. Komisioni i Pavarur i Kualifikimit ka zhvilluar dje seancën dëgjimore për Priftin. Trupa gjykuese përbëhet nga Firdes Shuli, Roland Ilia dhe Etleda Çiftja. Sipas raportit të ILDKPI- së, të lexuar në seancë rezulton se gjyqtarja në fjalë ka bërë deklarim të rremë. KPK deklaroi se pas këtyre indicieve janë zhvilluar hetime të thelluara nga ku rezultoi se gjyqtarja ka burime financiare të paligjshme. Po kështu, u tha se Prifti ka apartament 55 m ² në Korçë, një pasuri e bashkëshortit dhe nuk është deklaruar bashkëpronësia. Sipas KPK- së, ka mungesë të dokumentacionit ligjor justifikues. Ndërkaq, rezulton se gjyqtarja Entela Prifti ka të ardhura nga shitja e makinave. KPK deklaroi se Prifti i shet disa herë më shtrenjtë makinat se sa çmimi i blerjes dhe çmimet nuk reflektojnë me tregun. Një tjetër problematikë sipas KPK- së, ka qenë mosdeklarimi i transfertave në llogarinë e së motrës. Ndaj, KPK theksoi se gjyqtarja Prifti ka disa pasuri dhe llogari të padeklaruara. Entela Prifti ushtron prej 10 vitesh detyrën e kryetares së Gjykatës së Apelit të Korçës, që pas emërimit të saj në vitin 2008. Më parë, ajo ka ushtruar detyrën e gjyqtares pranë së njëjtës gjykatë. Në vitin 2011, Entela Prifti ka qenë anëtare e Kolegjit Zgjedhor. Paralelisht me detyrën, ajo ka ushtruar gjithashtu mësimdhënie në universitetin "Kristal" në Korçë për një periudhë disavjeçare. Analiza e pasurisë është një ndër tri shtyllat e rivlerësimit për gjyqtarët, së bashku me kontrollin e figurës dhe vlerësimin e aftësive profesionale.