Bleu një makinë të blinduar për Gruevskin, dënohet me 6 vjet burg ish- ministrja maqedonase
U përfshi në afera tenderësh, Jankullovska akuzohet për shpërdorim detyre
Ditën
e djeshme, ish- min istrja e Punëve të Brendshme e Maqedonisë, Gordana Jankullovska, u dënua me 6 vjet burgim për shpërdorim të detyrës në aferën e njohur me emrin "Tanku". Gjykata Penale e Shkupit e shpalli fajtore Jankullovskën për shkelje të procedurës së blerjes së një makine të blinduar për ish- kryeministrin e Maqedonisë, Nikolla Gruevski, në vlerë prej 600 mijë eurosh. Gjykatësja Dobrilla Kacarska tha se makina është blerë nga MPB- ja, por nga dëshmitë e siguruara ka rezultuar se, në fakt, ajo "është blerë për ish- kryeministrin Gruevski". Automjeti u ble nga Ministria e Brendshme për sigurinë e ish- Kryeministrit. Por krahas çmimit të konsideruar si fiktiv me qëllime përfitimi, ishministrja u shpall fajtore për prishje të procedurave të tenderit. Nga hetimet rezulton se ish- kryeministri e paracaktoi personalisht automjetin, duke shkelur procedurat e përzgjedhjes me tenderim, e duke i shkaktuar shtetit dëm të konsiderueshëm ekonomik. Jankullovska ishte mes emrave të procesit gjyqësor "Tank" që përfshinte të gjithë të akuzuarit për këtë çështje. Por ajo u gjykua në mënyrë të veçuar për shkak të shtatzënisë. Pak ditë më parë, Gjykata e Apelit la në fuqi vendimin për Gruevskin, i cili në maj u dënua me 2 vite e gjysmë burg. Gjykatësja tha se aspektet teknike të tenderit kanë favorizuar një kompani, ndërsa janë kërkuar edhe kushte të tjera të posaçme, me çka është përjashtuar mundësia e subjekteve tjera për të marrë pjesë në tender. Për të njëjtin rast, me 2 vjet burgim është dënuar edhe Gruevski, ndërsa me 4.5 vjet Gjoko Popovski, ish- zyrtar i lartë në Ministrinë e Brendshme. Skandali është zbuluar nga afera e përgjimeve që ishte publikuar nga opozita në shkurt të vitit 2015, ndërsa rasti është proceduar nga Prokuroria Speciale e Maqedonisë, e cila është themeluar për hetimin e shpërdorimeve të qeverisë së kaluar. Akuzat janë hedhur poshtë nga zyrtarët e dënuar duke i vlerësuar ato si "të motivuara politikisht". Jankullovkska vazhdimisht ka qenë në shënjestër të kritikave, në veçanti të opinionit shqiptar, për shkak të ofendimeve në adresë të shqiptarëve, të cilët në disa raste i ka quajtur "indianë".