Njohja e diplomave të profesionistëve, hapen negociatat në Ballkanin Perëndimor

Marrëveshja reciproke/ Kontribut i vlefshëm në përgatitjen për pranimin në BE

Janë

hapur negociatat për njohjen reciproke të kualifikimeve profesionale të mjekëve, dentistëve, arkitektëve dhe inxhinierëve civilë. Kjo marrëveshje negocimi është arritur nga vendet e Ballkanit Perëndimor gjatë takimit të parë të organizuar në Bruksel nga Këshilli Rajonal i Bashkëpunimit ( RÇ). Rezultati i pritur nga negociatat përfshin një marrëveshje reciproke të njohjes, e cila do të vendosë rregulla të përbashkëta në njohjen e kualifikimeve profesionale të aplikantëve, të cilët zotërojnë një diplomë nga secili prej gjashtë vendeve të Ballkanit Perëndimor. Në këtë mënyrë, këtyre individëve të kualifikuar profesionalisht do t'u mundësohet akses për të ushtruar profesionin në një tjetër ekonomi. Negociatat dhe marrëveshja e pritur mbi njohjen reciproke të kualifikimeve është pjesë e Planit Shumëvjeçar të Veprimit në Zonën Rajonale Ekonomike ( MAP REA) të arritur nga kryeministrat e rajonit vitin e shkuar në Trieste.

LËVIZJA E PROFESIONISTËVE

Gjatë hapjes së negociatave, sekretari i përgjithshëm i RÇ, Goran Svilanoviç, tha se kjo lëvizje e lirë e profesionistëve do të mundësojë që talentet të mund të qëndrojnë brenda rajonit. "Heqja e pengesave ndaj lëvizjes së profesionistëve dhe përmbushja e objektivit të MAP REA për të lejuar lëvizjen e mjekëve, stomatologëve, arkitektëve dhe inxhinierëve në rajon do të krijojë mundësinë që talentet të qëndrojnë brenda rajonit. Për më tepër, Draftmarrëveshja mbi Njohjen Reciproke të Kualifikimeve në Mjekësi, Stomatologji, Arkitekturë dhe Inxhinieri Civile është e bazuar në direktivën e BE- së 2005/ 36/ EC mbi njohjen e kualifikimeve profesionale dhe kjo do të kontribuojë në përgatitjen për pranimin në BE", - tha sekretari i përgjithshëm i RÇ, Goran Svilanoviç. Ndërkohë, Nicholas Cendrowicz nga Drejtoria e Përgjithshme e Komisionit Evropian për Negocimet e Fqinjësisë dhe Zgjerimit ( DG NEAR) theksoi rëndësinë e bashkëpunimit rajonal për zgjerimin e BE- së.

SYNIMI I TAKIMIT

Synimi kryesor i këtij takimi ishte të binte dakord për një plan negociatash të realizueshëm dhe realistë dhe për të identifikuar nevojat për ta bërë këtë qëllim një realitet. Ndërkohë, RÇ propozoi një plan veprimi mbi hapat drejt finalizimit të Marrëveshjes së Njohjes së Ndërsjellë nga Samiti i Ballkanit Perëndimor në Poloni korrikun e ardhshëm. Negociatorët kryesorë miratuan planin e propozuar të veprimit dhe shprehën optimizëm për t'i përfunduar negociatat në kohë për Samitin e Ballkanit Perëndimor në Poloni. Përveç Svilanoviç dhe Cendrowicz, pjesëmarrësit e takimit, duke përfshirë më shumë se 20 zyrtarë nga ministritë përkatëse dhe institucionet e tjera relevante, u mirëpritën gjithashtu nga Emir Djikic, drejtor i Sekretariatit të Marrëveshjes së Tregtisë së Lirë të Evropës Qendrore ( CEFTA), Tina Sariç, Iniciativa për Reformën Arsimore të Evropës Juglindore ( ERI SEE) dhe Gazmend Turdiu, Zëvendëssekretar i Përgjithshëm i Këshillit të Bashkëpunimit Rajonal.