Kapet me pistoleta dhe shpatë në lokal, arrestohet i "forti" i Fierit, Ilir Boriçi
"Nipçja" i Ben Qimes ishte në masën e sigurisë "Detyrim paraqitje" Policia: Është prangosur 5 herë për tentativë vrasjeje kanosje, shkatërrim prone dhe armëmbajtje pa leje
Një prej të "fortëve" të Fierit ka përfunduar në pranga në kuadër të operacionit "Forca e Ligjit". Bëhet fjalë për Ilir Boriçin, i cili u arrestua në flagrancë, pasi gjatë kontrollit i janë gjetur dhe sekuestruar dy pistoleta dhe një shpatë. Burime zyrtare nga policia lokale dje bënë me dije se 42- vjeçari është pjesë e grupit të quajtur "Boriçët", grup me precedentë kriminalë, kryesisht në fushën e krimeve kundër personit.
ARRESTIMI
Të armatosur rëndë, me veshje e maska, efektivë të FNSH- së dhe të policisë Fierit kanë ushtruar kontrolle të befasishme nëpër lokale të dyshimta në këtë qytet për kapjen e personave që qarkullojnë me armë zjarri dhe personave të shpallur në kërkim. Kontrollet janë kryer jo vetëm në lokale, por edhe në ambiente të ndryshme si edhe në akset rrugore kryesore e dytësore të qytetit të Fierit dhe Lushnjës. "Në vijim të zbatimit të planit të masave për ' Kontrollin e territorit, parandalimin e ngjarjeve kriminale dhe kapjen e autorëve të ndryshëm të veprave penale' si edhe nga mbajtja nën vëzhgim e ambienteve që frekuentohen nga persona me precedentë kriminalë, u bë i mundur arrestimi në flagrancë i shtetasit Ilir Boriçi", thuhet në njoftimin zyrtar të policisë. Sipas bluve, nga kontrolli i ushtruar në lokalin në lagjen "8 Shkurti" Fier, 42- vjeçarit iu gjetën 2 armë zjarri pistoletë dhe një shpatë. Po të njëjtat burime sqaruan se Boriçi është arrestuar nga policia 5 herë për veprat penale "Tentativë vrasje", "Kanosje", "Shkatërrim prone" dhe "Armëmbajtje pa leje". Aktualisht 42vjeçari ishte në masën "Detyrim paraqitje" për veprat penale "Armëmbajtje pa leje", "Kanosje" dhe "Shkatërrim prone". Ilir Boriçi ka lidhje familjare me një personazh tjetër të njohur në Fier dhe konkretisht Ben Qimen, një ndër personat më të kërkuar të drejtësisë italiane. Mësohet se Ben Qimja e prezantonte Boriçin si "nipçen" e tij, pasi ishte martuar me mbesën. Ndërkaq, po në kuadër të kontrolleve të ushtruara nga policia dhe FNSH- ja, u bë e mundur kapja dhe ndalimi i shtetasit të shpallur në kërkim Said Dervishi, 25 vjeç, banues në Lushnje. Gjykata e Rrethit Gjyqësor Lushnje ka caktuar masën e sigurimit "Arrest me burg" ndaj tij për veprat penale "Kanosje" dhe "Prodhimi dhe mbajtje pa leje e armëve dhe municionit luftarak". Ky shtetas, më 04.09.2018, në kodrat e fshatit Zhamë, gjatë një konflikti për motive pronësie ka qëlluar disa herë me armë zjarri automatik drejt vëllezërve N. M. dhe H. M..