Masakra në Mat, autori policëve: Më jepni bukë të mbush barkun, se jam shumë i uritur
Varrosen tre viktimat. I mbijetuari: Babai i njërit prej të vrarëve qerasi me raki Koxhajn "Vrasja…, njëri nga ata më fyeu dhe më qëlloi me shuplakë, ndaj qëllova, më pas nuk mbaj mend çfarë ndodhi"
Më jepni njëherë bukë të mbush barkun se jam shumë i uritur, pastaj flasim se përse e bëra vrasjen". Këto kanë qenë fjalët e para që ka thënë në komisariatin e policisë së Burrelit, kryeplaku i fshati Shëlli, Kujtim Koxha, i cili dy ditë më parë bëri masakër, duke vrarë me kallashnikov tre punonjës së Bashkisë së Matit dhe duke plagosur një tjetër. I pyetur se përse e bëri vrasjen e trefishtë që tronditi banorët e zonës dhe të gjithë opinionin publik, 51- vjeçari u ka kërkuar të mbush barkun me bukë. Ndërsa, i kanë thënë se do t'i caktonin një avokat, ai është shprehur se "avokatin e gjej vetë". Më pas, gjatë marrjes në pyetje nga hetuesit e çështjes, autori i ngjarjes së rëndë është justifikuar me fjalët se njëri nga viktimat e kishte fyer dhe e kishte qëlluar me shuplakë. "Njëri nga ata më qëlloi në shuplakë dhe më tha je i dehur. Më pas nuk mbaj mend se çfarë ka ndodhur", është shprehur 51- vjeçari, i cili pohohet të jetë person problematik. Më pas, Kujtim Koxha ka treguar se pas debateve për rrugën me punonjësit e bashkisë ka shkuar në shtëpi, 500 m larg lokalit ku po drekonin dhe ka marrë automatikun. Burime nga grupi hetimor bënë me dije se në vendin e ngjarjes u gjendën 11 gëzhoja, pasi kryeplaku i fshatit ka qëlluar me breshëri. Një nga të pranishmit ka tentuar t'ia heqë armën nga dora, pasi Koxha tentoi të vriste të gjithë ata që ndodheshin në lokal. Ndërkaq, mesditën e djeshme iu është dhënë lamtumira e fundit viktimave: Mentor Hoxha 36 vjeç, Erzen Aliaj 49 vjeç dhe Hamit Buçi. Ceremonitë e varrimit janë bërë në tri fshatra. Kjo për faktin se pasi ata jetonin në fshatra të ndryshme, konkretisht në Zonisht, Burgajet, Shëlli. Në varrimin e viktimave kanë marrë pjesë qindra njerëz, stafi i Bashkisë së Matit si dhe përfaqësues të PD- së, PSsë si dhe deputeti i LSI- së, Përparim Spahiu. Pasditen e djeshme ka mbërritur në Mat dhe kreu i PD- së, Lulzim Basha, i cili ka vizituar dhe ka ngushëlluar familjarët e tre të vrarëve. Gjithashtu, Basha ka qenë edhe në spitalin e Burrelit ku ka vizituar 40- vjeçarin Astrit Hani, i cili mbeti i plagosur, duke i mbijetuar masakrës. Ky i fundit, ndonëse në gjendje të rënduar psikologjike, tregoi dje për "Gazeta Shqiptare" minutat e tmerrit, kur pa se si Kujtim Koxha, ish- plakun e fshatit të qëllonte me breshëri automatiku tre kolegët e tij dhe atë vetë.
DËSHMIA E TË MBIJETUARIIT
Astrit Hani tha se dy orë para ngjarjes, autori i krimit kishte pirë raki me një nga viktimat, Hamit Buçin. Hani shokoi me dëshminë e tij, pasi pohoi se ndërsa babai i një prej viktimave, ( Mentor Hoxhës), i kishte lënë porosi pronarit të lokalit që ta qeraste Koxhën me një gotë raki nga ana e tij. "Kujtimi ishte dy orë para ngjarjes në atë lokal. Ishte ulur bashkë me Hamit Buçin. Pak më vonë, babai i njërit prej viktimave, Mentor Hoxhës, e qerasi me një dopio raki Kujtimin dhe më pas u largua. Aty ishin të gjithë punonjësit e bashkisë, edhe shoferët e makinave dhe varrmihës që po punonin për rrugën. Unë isha poshtë makinës ( shoferi i një prej mjeteve të bashkisë) se po e shihja një defekt dhe pashë që Kujtimi po debatonte me viktimat. Dëgjova që u thoshte: "Jam unë këtu, jo ju" dhe kur iku, i ofendoi. Madje ai tha ' do ta shihni për pak se kush jam unë'", - tha i mbijetuari. Më tej, Hani pohoi se gjithçka ndodhi gjatë kohës që ata ishin të gjithë duke ngrenë drekë. "Koxha u largua për 20 minuta nga lokali, se aq siç duket e kishte shtëpinë larg prej aty. U fut në derë me automatik dhe një çantë në dorë. Të parin qëlloi Mentor Hoxhën dhe më pas hapi zjarr me automatik te të tjerët. Vëllai i pronarit të lokalit që ishte te banaku, pas dere, e kapi nga duart dhe i ngriti automatikun lart dhe plumbat prekën tavanin. Po mos të kishte qenë, ai do ishin 13 viktima brenda në lokal", deklaroi 40- vjeçari Astrit Hani. Një ditë pas vrasjes së trefishtë janë zbardhur detaje të tjera rreth ngjarjes. Mësohet se kryeplaku Kujtim Koxha ishte një person problematik në fshatin e tij. Raportohet se para disa ditësh, 51vjeçari kishte qenë në spital, pasi ishte plagosur me thikë nga vëllai i tij pas një konflikti. Kujtim Koxha kishte qëndruar i shtruar për disa ditë në spitalin e Burrelit.