HEC- et në Valbonë, Meta: Të ruajmë ekosistemin nga projektet e nxituara

Presidenti në Tropojë, vlerëson Azemin dhe Berishën për rolin e tyre në tranzicion "Tropoja i priu lëvizjes për rrëzimin e diktaturës"

Presidenti Ilir Meta vlerë soi dje rolin e Tropojës për lirinë dhe pavarësinë, identitetin dhe dinjitetin kombëtar të vendit. Pa fshehur emocionin e veçantë, Ilir Meta u tha tropojanëve se malësia e Gjakovës përbën një epos plot histori dhe personalitete që i kanë dhënë shumë kombit shqiptar për lirinë dhe pavarësinë. "Tropoja përbën një epos plot histori dhe personalitete, që i kanë dhënë shumë kombit shqiptar për lirinë dhe pavarësinë, për identitetin dhe dinjitetin kombëtar, për politikën dhe diplomacinë, për arsimin dhe shkencën, për artin dhe kulturën. Mbarë populli shqiptar i është mirënjohës popullit të Tropojës për atë çfarë i ka dhënë kombit. Ky vend është libër i një historie të madhe", deklaroi z. Meta. Kjo sipas tij, sepse tropojanët kanë qenë gjithmonë të shqetësuar për fatet e Shqipërisë e të shqiptarëve. "Tropojanët u gjenden dhe kontribuuan në Lidhjen e Prizrenit, në Lidhjen e Pejës, në Lidhjen e Junikut, në Kuvendin e Vlorës, në Konferencën e Bujanit e në çdo ngjarje. Do të duhej një kohë e gjatë për të përmendur emrat e tyre me kontribute të paharruara për çështjen kombëtare si Haxhi Zeka, Bajram Curri, Binak Alija, Mic Sokoli Dervish Luzha e shumë të tjerë", deklaroi Ilir Meta. Kreu i shtetit theksoi veçanërisht rolin e personaliteteve të Tropojës në demokracinë e vendit, duke nënvizuar se dy udhëheqësit kryesorë të Lëvizjes Demokratike, Azem Hajdari dhe Sali Berisha ishin nga Tropoja. "Pesha që Tropoja dhe tropojanët kanë mbajtur në kapërcimin e jashtëzakonshëm nga diktatura në demokraci është e rrallë. Përkulem me respekt e mirënjohje ndaj veprës së Azem Hajdarit, udhëheqësit të Lëvizjes Studentore. Nuk duhet të harrojmë se dy udhëheqësit kryesorë të Lëvizjes Demokratike si Azem Hajdari, ashtu edhe Sali Berisha ishin nga Tropoja. Po jo vetëm ata, edhe shumë të rinj të tjerë, edhe shumë personalitete të tjera, intelektualë si Besnik Mustafaj e shumë të tjerë ishin pikërisht nga Tropoja", theksoi Meta. Ai vlerësoi rolin e Berishës edhe për një nga veprat më strategjike në Shqipëri, Rrugën e Kombit. "Nuk duhet të harrojmë se pa vendimmarrjen dhe vendosmërinë e Sali Berishës, edhe sot Rruga e Kombit nga Tirana në Prishtinë mund të mos ishte bërë dhe shqiptarët do të vazhdonin të udhëtonin drejt njëritjetrit përmes Maqedonisë", u shpreh z. Meta. Presidenti përmendi se Tropoja ka qenë dhe vazhdon të mbetet një krahinë me rëndësi strategjike mbarëshqiptare dhe fqinjësore. Presidenti nuk anashkaloi edhe debatin e madh rreth ndërtimit të HEC- eve në Valbonë. "Ekosistemi i bjeshkëve të veriut është një nga pasuritë më të mëdha natyrore e turistike të popullit shqiptar. Këtë ekosistem duhet ta ruajmë me çdo mjet nga projektet e nxituara, të pamenduara, të shtyra nga politikat ditore, por edhe interesat e çastit. Tropoja është një trevë e jashtëzakonshme thesari kulturor kombëtar. Zoti e bekoftë këtë vend të mrekullueshëm dhe popullin e mrekullueshëm të Tropojës!", u shpreh z. Meta. Në vijim të vizitës së tij së Tropojë, presidenti u prit nga kryetari i bashkisë, Besnik Dushaj, i cili i uroi mirëseardhjen dhe e falënderoi për këtë vizitë. Pas takimit, Presidenti Meta vendosi një kurorë me lule dhe u përkul me nderim para memorialit të udhëheqësit të Lëvizjes Studentore dhe Dëshmorit të Atdheut, Azem Hajdari. Vizita e presidentit vijoi në "Festën e Gështenjës", që është kthyer në një veprimtari tradicionale për këtë qytet çdo vit në tetor, muajin e vjeljes së gështenjave. Gjatë "Festës së Gështenjës", presidenti vlerësoi "Unionin Artistik të Kombit Shqiptar" me titullin "Kalorës i Urdhrit të Skënderbeut" si dhe dekoroi regjisorin Llesh Nikolla dhe balerinën e valltaren, Enida Çami. Presidenti mori pjesë edhe në ceremoninë e përurimit të punimeve të ish- hotel "Valbonës" (' Turizmi' i vjetër) në Valbonë, duke u ndalur më pas në një takim pune me operatorët turistikë si dhe me shoqatat e turizmit në Valbonë. Meta vlerësoi disa personalitete të spikatura të artit, kulturës dhe gazetarisë të Tropojës, z. Islam Lauka, z. Ndue Smail Ukcamaj, z. Skënder Zeqir Dezhlani, Murat Ali Hajdarin ( pas vdekjes), z. Skënder Ram Haklaj si dhe Xhevahire Elez Gashin ( pas vdekjes).