Genc Pollo: Eurodeputetët po kërkojnë sqarime nga qeveria për lidhjet me krimin
Opozita dorëzon memorandume sqaruese në Komitetin e Stabilizim Asociimit "Shumë shpejt çështja do të sqarohet në gjykatë"
Përfaqësuesit e opozitës dorëzuan memoran dume sqaruese në Komisionin e Përbashkët të Stabilizim Asocimit. Në një deklaratë pas mbledhjes së përbashkët, nënkryetar i delegacionit shqiptar, deputeti demokrat Genc Pollo u shpreh se "në mbledhjen e Komisionit të Përbashkët të Stabilizim Asocimit shpjeguam gojarisht e dorëzuam memorandume sqaruese se është tallje me dinjitetin e njeriut dhe dinjitietin e ligjit të diskutojmë për luftën kundër krimit, drogës e korrupsionit e të miratojmë deklarata ndërkohë që mbledhjen e ( bashkë) kryeson Taulant Balla. Mendoj se edhe shumë deputetë normalë të mazhorancës dhe i gjithë opinioni publik bie dakord për sa më lart". "Bien dakord edhe shumë eurodeputetë të informuar, pavarësisht se ata ruajnë aparencat dhe thonë me të drejtë se kjo çështje duhej zgjidhur në Tiranë. Por Rama e Ruçi nuk deshën të pranojnë një zgjidhje të thjeshtë që u propozuam para një jave. Të emëronin një socialist normal ( ka ende të tillë) në krye të delegacionit parlamentar. Pse nuk e bënë e dinë ata", u shpreh deputeti Pollo. Duket se demokratët kanë ndërmend që për të zgjidhur këtë të shfrytëzojnë edhe gjykatën. "Ndonjë deputet thotë se kjo çështje sqarohet në gjykatë. E drejtë edhe kjo. Aty do të sqarohet në një ditë jo të largët. Por hë për hë prokuroria e gjykatat janë me probleme e nuk para merret me skandalet e qeverisë. Pastaj politika është për të vepruar shpejt kur ka bazë e jo me vite. Dhe Balla i ka pranuar një pjesë të fajësimeve", tha më tej, Pollo. Sipas tij, "eurodeputetët kërkojnë sqarime nga ekzekutivi i tyre për raste Bego, Beço, Rraja etj. Interesante të ndjekim zhvillimet.
Eurodeputetët mund të mos kenë mekanizëm procedural për ta larguar Ballën. Por, siç e thanë, do zënë hundën me dorë e vazhdojnë një orë punë. Por të mos presim nga Parlamenti Europian të na zgjidhi problemet një më një. Balla është problemi i radhës i Rilindistave. Aty ku lindi atu duhet zgjidhur: në Shqipëri!", theksoi Pollo. Sipas tij, memorandumet e opozitës do të bëhen publike nga BE në ditët në vijim. Gjatë kohës së bojkotit të mbledhjes së përbashkët, Pollo foli për mediat në Shqipëri. "Edi Rama nguli këmbë, ndoshta më shumë nga halli sesa nga qejfi, që Taulant Balla të mbetet fytyra parlamentare e Shqipërisë kundrejt Parlamentit Europian e Bashkimit Europian. Kjo është mënyra më efektive për të diskredituar Shqipërinë para Europës mbasi i mbushën radhët e deputetëve e kryebashkiakëve socialistë me soj e sorollop banditësh. Pse duhet që i pari i delegacionit parlamentar në Bruksel të jetë boçe e brekushe me begot, beçot, rrajot e të tjerë si ata. Apo tani që na doli ministri për Europën në biseda me bandat kush pyet për Taulantin", u shpreh Pollo. Sipas tij, "kjo është hera e fundit me Ballën bashkëkryetar në këtë parlament. Me Ballën shef delegacioni parlamentar sabotohet integrimin europian dhe hapja e negociatave vitin tjetër".