PS- PD sherr në Bruksel, PD: Balla mik me kriminelë. Eurodeputetët: Provojini
Opozita bojkoton miratimin e deklaratës së përbashkët, shkon për drekë Fleckenstein e Kukan- opozitës: Shkoni në prokurori
Socialistët dhe demokratët i transportuan dje, mosmarrëveshjet e tyre në Bruksel e pikërisht në mbledhjen e përbashkët të Komisionit Ndërparlamentar Shqipëri- BE. Sapo ka marrë fjalën Taulant Balla, në mbledhjen e Komitetit ndërparlamentar të Stabilizim- Asociimit mes Shqipërisë dhe Parlamentit Europian, demokratët e ndërprenë duke kërkuar fjalën për procedurë. Pas një këmbënguljeje të gjatë, bashkëdrejtuesja tjetër e mbledhjes, Monika Makovei i dha Genc Pollos 30 sekonda kohë. "Ky takim bashkëdrejtohet nga një mik i ngushtë, siç e ka pranuar ai vetë, i një trafikanti të njohur droge, i dënuar në Itali me 22 vite burg. Ky bashkëdrejtues është Taulant Balla. Është turp që kryeministri ynë nuk e zëvendësoi atë me një tjetër deputet socialist normal, siç kërkuam javën e kaluar", tha Genc Pollo. Me mbarimin e kohës, mikrofoni i Pollos u fik, por kolegia e tij demokrate Albana Vokshi, që i ishte ulur në krah, kishte gati celularin për ta filmuar. "Do të ishte një maskaradë, një tallje për komitetin tonë, nëse ne adoptojmë rekomandime duke bërë apel për luftën ndaj krimit, narkotikëve dhe korrupsionit, me Ballën që drejton takimin. Unë nuk dua të jem pjesë e kësaj maskarade e talljeje, ndaj do të largohem dhe nuk mund të kthehem, për sa kohë Balla qëndron në krye të panelit. U bëj apel kolegëve të mi të bëjnë të njëjtën gjë", tha më tej Pollo. Pas kësaj, deputetët opozitarë të delegacionit shqiptar braktisën mbledhjen. Por pas kësaj deklarate reagoi eurodeputetja, bashkëdrejtuese e tryezës, Monica Makovei: "Ne flasim për dialog politik, ku është? Pse të largohesh që në fillim, me një deklaratë të parapërgatitur? Ata erdhën në këtë takim në Bruksel me paratë e qytetarëve shqiptarë, për të ngrënë një drekë të mirë e për t'u larguar",- tha Makovei. Raportuesi për Shqipërinë, Knut Fleckenstein ftoi opozitën të ndjekë rrugën e institucioneve për denoncimet e saj. "Ju lutem, kuptoni se unë nuk jam prokuror, polic apo gjyqtar. Kërkesa ime për PD është: bëni detyrat e shtëpisë, shkoni në prokurori, sigurohuni që të gjitha çështjet do të ndiqen me seriozitet dhe, nëse diçka është e vërtetë ju mund të jeni të sigurtë që jo vetëm unë si raportues, por edhe të gjithë kolegët e mi këtu në parlament do të përballen me këtë çështje në mënyrën e duhur.
Nuk është se ne nuk ju besojmë juve, por ne nuk na lejohet t'iu besojmë juve, nëse ju nuk ndiqni procedurën normale",- tha Fleckenstein. As europarlamentari Kukan, që i përket spektrit të djathtë, nuk iu doli në mbrojtje demokratëve. "Ata paraqitën akuza shumë serioze, por këto çështje duhen zgjidhur në Shqipëri, në parlamentin Deputetja socialiste, Elisa Spiropali, përfaqësuese e delegacionit shqiptar në Komitetin e Stabilizim Asociimit, BE- Shqipëri, tha se opozita u turpërua në sytë e europarlamentarëve. Spiropali tha se opozita nuk ka kërkuar përjashtimin e Ballës nga delegacioni, por ka hedhur akuza dhe baltosje kundër vendit. "Ishte e shëmtuar dhe turpshme ajo që ndodhi. Nuk ishte bojkot, por ishte një largim i beftë që "shastisi" edhe deputetët e PE. Nuk janë deputetë të majtë, por ka edhe të majtë dhe të djathtë që u befasuan nga sjellja aspak e denjë e opozitës shqiptare. Janë skena që i kemi parë në parlamentin shqiptar dhe shpresonim se do t'ia kursenin deputetëve europiane",- tha për ngjarjen e djeshme Shalsi.