Rama kritika kreut të policisë: Balili s'është kapur, të mos na e kujtojë SHBA
"Xhisiela", Kryeministri: Ku ishte SHÇBA kur shpifësi Nuhu solli letrën? "Largoni drejtorët në zonat ku "të fortët" bëjnë ligjin"
Kryeministri Edi Rama i kërkoi dje, policisë që dalldia e shpifjeve dhe fabrikimeve të mos ndikojë në punën e saj. Nisur nga akuzat e opozitës, kryeministri së bashku me ministrin e Brendshëm takuan dje, strukturat drejtuese të Policisë së Shtetit. Gjatë fjalës së tij, Rama kërkoi që si kundërpërgjigje ndaj sulmeve politike "shumëfishimin imediat të goditjeve ndaj krimit dhe ndaj çdo shkelësi të ligjit, që nga "të fortët" e llojit të atyre që sollën përgjakje në mes të bllokut në Tiranë, deri te kundërvajtësit që shkelin rregullat e qarkullimit, dëmtojnë mjedisin apo cenojnë në një formë, ose në një tjetër qetësinë e komunitetit". Duke krahasuar statistikat e kriminalitetit ndër vite, kryeministri tha se ' sot, 40 vrasje, nga janari në shtator dhe në 2012- ën më shumë sesa dyfishi". Sa i përket indeksit të sigurisë, Rama tha se "Tirana ka indeks më të lartë sigurie se Roma, apo Athina". Rama më tej se "politika me krimin është aleat i krimit, siç është thënë dhe pranuar botërisht dhe është fakt që kjo politikë akuzash, shpifjesh dhe fabrikimesh kriminale, policin mund ta dekurajojë, ndërsa kriminelin vetëm e frymëzon". Më tej ai e quajti arritje të madhe të qeverisë që në këto 5 vjet, Policia e Shtetit fitoi pavarësinë nga partia në pushtet. "Deputetë, ministrat, kryeministri, politikanët në tërësi nuk i fusin dot hundët në emërimet në Polici dhe nuk guxojnë të ngrenë telefonin për t'i kërkuar favore cilitdo prej jush, drejtues policie, madje, më vjen shumë mirë që në ndonjë rast kur kanë tentuar ta bëjnë kanë marrë ankesat e tyre, sepse drejtuesi përkatës nuk i është përgjigjur dhe nuk u shkon mendja të shkelin rregullat e qarkullimit", u shpreh kreu i qeverisë.
XHISIELA
Duke përmendur rastin "Xhisiela", Rama tha se edhe në këtë rast "policia nuk e favorizon, por e trajton si gjithë të tjerët djalin e një deputeti të partisë në pushtet, duke mbajtur anën plotësisht të ligjit, në mbështetje të një vajze që e denoncoi atë për dhunë dhe duke referuar çështjen në prokurori, pa një, pa dy". "Edhe për një sh- merave, del qartë tamam si ato kronikat "No comment" se e tërë skena që ngriti gjithë atë dallgë balte mbi policinë se shtetit dhe mbi të gjithë ne, e përshkruar në letrën e shpifësit, është një sajesë e tij, fund e krye". E duke vijuar me "Babalen", Rama tha se "ne të akuzuarit direkt, të audio video Babale rrëfenjave, kësaj jashtënxjerrjeje të re nuk kemi çfarë i bëjmë tjetër, përveç se të telendisim gjyqeve çdo shpifës". Duke iu drejtuar Drejtorit të Përgjithshëm të policisë, Ard Veliu duke i thënë se në rastin e akuzave që atij ju bënë nga opozita t'i drejtohej prokurorisë "për t'u dëgjuar në lidhje me shpifjen e bërë ndaj jush dhe të ngrinte pse jo një padi për shpifje për shkak të detyrës ndaj politikanit të biodegraduar".
"BALILI"
E duke vijuar komunikimin me drejtorin e përgjithshëm, Rama kërkoi më shumë reagim nga policia. "Për shembull, unë nuk dua, i dashur Drejtor i Përgjithshëm i Policisë së Shtetit që të presim të vijë ambasadorja e re amerikane për të na kujtuar gjatë ndonjë fjalimi përshëndetës që Klement Balili nuk është kapur akoma. Ashtu sikundër, nuk dua që të vazhdojnë të rrinë në detyrë, drejtorë dhe shefa komisariatesh, në zona apo në pika ku dinjiteti për të cilin fola vihet në diskutim, jo vetëm nga "të fortët" dhe nga makinat e tyre, por as nga kundërvajtësit që gërryejnë lumenjtë e male, që presin pemë, që ndërtojnë tek- tuk ende, por ndërtojnë, pa leje, që hedhin plehra dhe inerte, në vende të paautorizuar dhe me radhë",- theksoi Rama. "Unë e di shumë mirë se sa seriozisht po përpiqeni, qoftë për të kapur Klement Balilin, qoftë për të gozhduar zvarranikë të tjerë të botës së krimit, përmes operacionit ' Forca e Ligjit', statistikat e punës së të cilit flasin qartësisht për këtë përpjekje apo qoftë për të parandaluar edhe autorët e krimeve ndaj mjedisit, që sot janë shumë më pak se dje, por ne nuk kemi luksin që të vazhdojë të pritet, qoftë dhe një pemë", nënvizoi kryeministri. "T'ia marrim frymën krimit si asnjëherë më parë, frymën që ka dhe frymën që i japin. Shumëfishim forcash, energjish, goditjesh dhe rezultate të reja dhe domethënëse për "të fortët",kërkoi Rama nga policia.