Balla: Sot, kallëzim të plotë për Bashën, Salianjin dhe Hoxhën
E quajti "bandë e Berishës", Sali Lushaj padit kreun e grupit të PS "Lulzim, mos kërko marrëveshje për t'u tërhequr nga paditë"
Kreu i grupit par lamentar të PS- së, Taulant Balla deklaroi dje se sot do të bëjë një tjetër kallëzim të plotë për vepra penale të kryera në bashkëpunim për Lulzim Bashën, Ervin Salianjin dorë për dore me Florenc Hoxhën. Përmes një statusi në rrjetin social "Facebook", Balla tha: "Lulzim Basha është zyrtarisht në hetim për ' kallëzim të rremë të kryer në bashkëpunim' me shpifës Nuhun. Pse nuk shkon PD t'i shohë kamerat e komisariatit dhe praninë time në komisariatin e Fushë- Krujës, apo edhe të vetë Nuhut? Ti Lulzim si person në hetim ke të drejtë t'i shohësh. Apo hajt se do harrohet. Nuk e lë unë në harresë, Lulzim! Sepse dje turpërove Shqipërinë, aspak mua, me një paçavure që i dhe të lexojë Pollua", u shpreh Balla. "Edhe Ervin Salianji është zyrtarisht në hetim bashkë me ' Babale& co'. Nesër ( sot), tek Prokuroria e Krimeve të Rënda depozitoj kallëzim të plotë për vepra penale të kryera në bashkëpunim për Lulzim Bashën, Ervin Salianjin dorë për dore me Florenc Hoxhën, pazarxhinjtë e sëmurë, që ranë brenda në kurthin që ngritën vetë me ca personazhe qesharakë e që nuk ka alibi që i shpëton", bëri të ditur kreu i grupit parlamentar të PS- së. Duke iu drejtuar kreut të PD- së, Balla tha: "Ti Lulzim duhet të sqarosh pazaret me këta persona, të bëra në SHQUP apo në oborrin e SHQUP- it. Kallëzimi dhe çdo informacion tjetër është në dispozicion të prokurorisë, sepse shqiptarët duan të dinë të vërtetën sa më shpejt. Luli kërcen nga një degë në një degë, nga një gënjeshtër në tjetrën. Turp s'ka". "Lulzim, mos kërko marrëveshje për t'u tërhequr nga kallëzimet. Do t'i shkojmë deri në fund secilës prej shpifjeve", nënvizoi Balla.
PADIA E LUSHAJT
Ndërkohë dje, Sali Lushaj ish- truproja i Sali Berishës paditi në Gjykatën e Tiranës deputetin e Partisë Socialiste, Taulant Ballën. Mësohet se Gjykata e Tiranës ka depozituar padinë e Lushajt. Ky veprim vjen pas deklaratës së kreut të grupit parlamentar të PS- së, Balla, i cili tha se Lushaj ishte pjesë e "bandës së Berishës". Lushaj kërkon dy milionë lekë të reja dëmshpërblim nga Balla. Në një video të publikuar për çështjen "Babalja", deputeti i PDsë, Ervin Salianji paraqiti sipas tij bisedën mes Sali Lushajt dhe Fredi Alizotit, bisedë në të cilën implikohej emri i Ballës. Kaq mjaftoi që socialisti të "shpërthente" në akuza ndaj Lushajt. Balla e ka vënë në qendër të sulmeve të tij Lushajn edhe herë të tjera, kur ky i fundit ishte pjesë e një proteste të organizuar nga PD në dhjetor të vitit të kaluar, duke e cilësuar atë si njeri të besuar të Berishës.
GENC POLLO
Deputeti demokrat pranoi që sherri i bërë në PE ditën e hënë ishte i pakëndshëm. "Këtu mund të biem dakord, sepse qoftë të ngresh akuza personale, qoftë ta bësh këtë në një kontekst europian nuk besoj që në vetvete i pëlqen njeriu", tha Pollo. Sipas tij, eurodeputetët po kërkojnë informacion për Ballën.