Skënderbeu del në stërvitje, lojtarët me sytë nga bankomati
Në Korçë gjërat nuk po ecin siç duhet. Lojtarë të pamotivuar dhe KAS- i që po zvarritet Klubi s'garanton asgjë, pret përqindjet e shitjeve
Te Skënderbeu ka një çështje, ose më saktë ka disa çështje që së bashku e bëjnë mjaft të turbullt qiellin mbi Korçë, duke rritur shumë dyshimet e tifozëve rreth asaj që do të jetë e ardhmja e klubit bardhekuq. Kjo sepse për herë të parë që prej vitit 2010 te Skënderbeu ka probleme financiare. Diçka e tillë dukej një e shkuar e largët, në kohën kur Agim Zeqo dhe Ardjan Takaj nuk kishin zbarkuar ende në Korçë për të marrë kontrollin e klubit që më pas do të dominonte futbollin shqiptar, pavarësisht polemikave që e kanë shoqëruar gjatë kësaj periudhe. Dje lojtarët e Skënderbeut kanë dalë në stërvitje të heshtur dhe kokulur. Ata e kanë pasur mendjen ende te rrogat e prapambetura, ndërsa nga ana e klubit nuk ka pasur asnjë komunikim zyrtar në lidhje më këtë situatë, madje ç'është më e habitshmja as nuk kanë reaguar publikisht për këtë ngjarje. Ajo që mësohet nga burime të afërta me klubin bardhekuq, është se presidenti Takaj po pret përqindjet e shitjes së Peter Olainkës dhe ndonjë lojtari tjetër për të krijuar kapitalin e nevojshëm për të siguruar përfundimin e sezonit.
NË PRITJE TË KAS- it
Pasiguria duket se do të vazhdojë gjatë, pasi nuk ka ende asnjë datë reale për zhvillimin e seancës dëgjimore në KAS të Lozanës që do të përcaktojë fatin e klubit korçar. Fillimisht mendohej se gjyqi do të zhvillohej në shtator, rreth katër muaj pas vendimit të dalë nga UEFA, e më pas në tetor, siç janë shprehur drejtuesit më të lartë të klubit. Por një gjë e tillë nuk ndodhi, ashtu siç duket se nuk do të ndodhë edhe gjatë nëntorit. KAS i Lozanës ka publikuar sot datat e reja të shqyrtimit të çështjeve që do të trajtojë së afërmi dhe deri në fundit të nëntorit janë regjistruar 19 çështje, të cilat do të merren në shqyrtim. Asnjë prej tyre nuk është ajo mes Skënderbeut dhe UEFA- s, që do të thotë se edhe për muajin nëntor nuk do të ketë asnjë të re në këtë drejtim. Në një kohë kur të gjithë lojtarët deklarojnë se presin vendimin e KAS për të vendosur se çfarë do të bëjnë në të ardhmen, në radhët e klubit korçar shtohet pasiguria dhe nëse vendimi nuk del para mbylljes së vitit, në janar mund të përjetohet një tjetër eksod nga radhët e kësaj skuadre.