Mbyllja e portaleve, OSBE letër Ramës: Cenon lirinë e medias
Rama, bisedë me Desir: Paketa antishpifje, të hapur për çdo sugjerim Mbyllet afati, AKEP: Portalet janë regjistruar
OSBE e sheh si cenim të lirisë së medias mbylljen e portaleve ' online'. Përfaqësuesi i OSBEsë për lirinë e medias, Harlem Desir, shprehu dje shqetësimin për lajmërimin për një sistem të ri regjistrimi për 44 faqe interneti në Shqipëri dhe mbylljen e mundshme të tyre. Më 15 tetor, Autoriteti i Komunikimeve Elektronike dhe Postare në Shqipëri publikoi një listë me 44 faqe interneti mediatike, që duhet të regjistrohen pranë Qendrës Kombëtare të Biznesit dhe të pajisen me NIPT brenda 72 orësh, të cilin duhet ta publikojnë pastaj ' online'. Mosrespektimi i këtij urdhri rezulton në mbyllje të faqeve të internetit. Kjo nismë, sipas qeverisë bëhet për t'u dhënë zgjidhje shpifjeve ' online'. Por, OSBE jep alarmin se mund të sjellë efekte shumë negative në lirinë e medias. "Shtetet nuk duhet të imponojnë regjistrimin e detyrueshëm për mediat ' online' si parakusht për punën e tyre, gjë që mund të ketë efekt shumë negativ në lirinë e medias. Kjo praktikë, kur vihet në zbatim, mund të kufizojë ndjeshëm aksesin e publikut në burime të larmishme informacioni dhe pluralizmin e zërave, si edhe gërryen të drejtën e lirisë së shprehjes dhe të informimit ' online'", deklaroi Desir. Ai u bëri thirrje autoriteteve shqiptare t'i rishikojnë këto masa, të shqyrtojnë të gjitha alternativat e mundshme për trajtimin e çështjes së shpifjes dhe të fillojnë një debat gjithëpërfshirës me aktorët relevantë të shoqërisë civile dhe medias. "Është tejet e rëndësishme që të sigurohet më shumë informacion rreth objektivave të saktë të masave të shpallura, si edhe për kriteret mbi bazën e të cilave janë përzgjedhur këto 44 faqe interneti", tha z. Desir.
REAGIMI
Kryeministri Edi Rama reagoi dje pas qëndrimit të OSBE- së dhe ka deklaruar se është i hapur për të diskutuar dhe për të pranuar çdo sugjerim për të miratuar paketën antishpifje dhe Paketa antishpifje e iniciuar nga kryeministri Rama nis me legalizimin e portaleve. Kryeministri i cilësoi si "fantazma" pa adresë dhe pa emër, portalet e paregjistruara në Qendrën Kombëtare të Bizneseve. Të hënën AKEP publikoi një listë me portalet e paregjistruara dhe la afat 72 orë që të publikojnë numrin e NIPT- it në faqen e tyre ' online', pasi në të kundërt do të bëhet mbyllja e çdo portali të paregjistruar.