Qeveria nxjerr nga zyra Shoqatën Antikomuniste të të Përndjekurve
Reagimi, Cika: Shantazh i pastër politik
Ministria
e Drejtësisë i ka kërkuar në datën 16 tetor Shoqatës Antikomuniste të drejtuar nga z. Nebil Cika që të largohet nga zyrat në godinën e kryesisë së Kuvendit. Ministria e Drejtësisë e justifikon këtë me arsyetimin se, "vë në rrezik sigurinë e Kolegjit të Posaçëm të Apelimit dhe Komisionari Publik të Vetingut". Shoqata Antikomuniste e ish- të përndjekurve politikë e konsideron urdhrin e Ministrisë së Drejtësisë si dëbim- internimet që u bëheshin njerëzve gjatë diktaturës, ku të ashtuquajturit armiq të komunizmit nxirreshin nga banesat dhe pronat e tyre, burgoseshin, dëboheshin e internoheshin në fshatrat e humbura e të izoluara. "Ne i kërkojmë qeverisë shqiptare të heqë dorë nga këto praktika komuniste shantazhi ndaj të përndjekurve politikë antikomunistë, që kanë si qëllim pengimin e punës sonë, mbylljen e gojës për krimet komuniste dhe padrejtësitë e tjera që i janë bërë e po i bëhen shtresës sonë nga komunistët dhe pinjollët e tyre politikë e gjenetikë dhe të garantojë kushtet bazike të funksionimit të shoqatës, siç janë zërat pa të cilat aktiviteti ynë është i pamundur. U kërkojmë autoriteteve të larta shtetërore, presidentit etj., të ushtrojnë autoritetin e detyrës për të ndalur rikthimin e metodave të luftës së klasave. I bëjmë thirrje opozitës të reagojnë ndaj këtij shantazhi të pastër politik të qeverisë. U kërkojmë përfaqësive diplomatike perëndimore SHBA, BE etj., të përdorin autoritetin dhe ndikimin e tyre ndaj qeverisë shqiptare, me qëllim ndërprerjen e shantazhit politik ndaj nesh", thuhet në deklaratën e shoqatës.