Arrestimi i reperit Stresi, policia: Pjesë e një grupi kriminal me mbi 25 persona
Këngëtari kishte rol periferik në grup. Priten të vihen në pranga persona të tjerë "Ishte në përgjim prej 1 viti, orientonte shitësit e drogës në ish- Bllok e periferi të Tiranës"
Një ditë pas arrestim it të këngëtarit Arkimed Lushaj i njohur ndryshe si Stresi janë zbardhur detaje të reja në lidhje me ngjarjen që bëri bujë në media. Kjo për faktin se nuk pritej që 31- vjeçari me gjithë karakterin rebel e që merret me art të ishte anëtar i një grupi kriminal. Mësohet se ai është i pari nga anëtarët e grupit kriminal që operonte në fushën e narkotikëve dhe atë të gjobëvënies që përfundon në pranga. Burime nga policia e Tiranës dje bënë me dije se Arkimed Lushaj ishte që prej afro një viti në përgjim. Stresi është përgjuar teksa komunikonte me disa persona të inkriminuar për trafikun e drogave. Po kështu, në përgjimet ambientale dhe ato telefonike, këngëtari është kapur duke orientuar shitësit të çojnë drogë në disa vende, kryesisht lokale në zonën e ishBllokut, por edhe në periferi të kryeqytetit. Po kështu, burime të sigurta nga policia thanë për "News 24" dhe "Gazeta Shqiptare" se në grupin kriminal me mbi 25 persona, Stresi nuk ka rol drejtues, por periferik. Urdhri i arrestit ndaj tij u ekzekutua mbrëmjen e së mërkurës, pasi kishte informacion se do ikte jashtë shtetit. Ndërkaq, burimet e mësipërme pohuan se në ditët në vijim pritet të ketë arrestime të tjera në Tiranë, të dyshuar si pjesë e grupit kriminal, ku bënte pjesë dhe reperi Stresi. Policia po mban në vëzhgim edhe disa persona të tjerë.
ARRESTIMI
Policia dje ka publikuar momentin e arrestimit të Arkimed Lushajt. I shtrirë në krevat, përmbys, gati nudo, policët i vënë prangat Stresit që është kapur totalisht në befasi nga operacioni i policisë në një dhomë hoteli në Linzë. 31- vjeçari u vu në pranga si pjesë e një grupi kriminal të trafikut të drogës dhe krimeve kundër personit. Arrestimi u bë nga njësia Hetimore e Task Forcës Speciale Vendore Tiranë në Departamentin e Policisë Kriminale pranë Drejtorisë së Përgjithshme të Policisë së Shtetit në bashkëpunim me Forcën e Posaçme Operacionale të Policisë së Shtetit. Gjykata pranë Shkallës së Parë Tiranë me vendimin nr. 1972 datë 17.10.2018, ka caktuar
masën e sigurisë "arrest me burg" ndaj tij në lidhje me veprën penale "Prodhim dhe mbajtje pa leje të armëve luftarake". Ndalimi i Arkimed Lushajt u bë pas një hetimi disamujor në bashkëpunim me Prokurorinë pranë Gjykatës së Shkallës së Parë Tiranë me metoda speciale të hetimit, që janë kryer në funksion të një grupi kriminal që operon në Tiranë në lidhje me aktivitetin e kundraligjshëm me tendencë "Trafikim narkotikësh" dhe "Krimeve kundër personit". Gjatë arrestimit, Stresit i janë gjetur dhe sekuestruar në cilësinë e provës materiale një sasi e vogël lënde narkotike e dyshuar kokainë, një armë zjarri pistoletë e tipit "Pjetro Beretta", si dhe 12 fishekë të modelit 7.65 mm. Bashkë me Stresin ka qenë dhe 20- vjeçarja me inicialet P. Ç., e cila është nën hetim në gjendje të lirë për veprën penale "moskallëzim krimi".