Baballarët "zhdëpin" në dru fëmijët, s'lejojnë bashkëshortet të punësohen
Qendra "Vatra": Grupmosha më e prekur, nga 4 deri në 18 vjeç. 212 viktima të reja në një vit Raporti i 2017- ës: Shtohen rastet e dhunës në familje
Shifra të frikshme zbardhen lidhur me dhunën në familje, ku vetëm një prej qendrave psiko- sociale ka pasur 212 raste të reja. Këto statistika zbardhen sot në "Gazetën Shqiptare" sipas raportit më të fundit të qendrës "Vatra" në Vlorë, e cila thekson se kanë marrë asistencë edhe 85 fëmijë të viktimave të dhunës. "237 viktima të dhunës në familje, prej të cilave 212 raste të reja dhe 85 fëmijët e tyre të asistuara për herë të parë gjatë vitit 2017, konkretisht 190 vajza dhe gra, 9 djem dhe burra dhe 16 dhunues", - thuhet në raport. Nga 212 raste të asistuara për herë të parë gjatë vitit, 185 ( 87%) janë vajza dhe gra dhe 25 ( 13%) janë meshkuj. Vihet re një numër i lartë i përfituesve të gjinisë mashkullore në dallim me vitin 2016.
GRUPMOSHA MË E DHUNUAR
Gjatë vitit 2017 vihet re një përfshirje e të gjitha grupmoshave në ciklin e dhunës. Grupmosha më e prekur është 4- 18 vjeç ( 30%), ndjekur nga grupmosha 26- 35 vjeç, ( 21%). Në krahasim me 2016- ën vihet re një ndryshim, pasi është rritur numri i përfitueseve të mitur. Në lidhje me kategorinë e djemve dhe burrave, numrin më të lartë prej tyre e zë grupmosha 26- 35 vjeç, duke qenë se në këtë moshë, ata kanë predispozitën më të lartë për të qenë dhunues dhe janë më të prirë për të kërkuar ndihmë në dallim me grupmoshat më të mëdha.
LLOJET E DHUNËS
"Gjatë intervistave me 212 raste që kanë deklaruar se kanë pësuar dhunë dhe gjithashtu kanë ushtruar dhunë, në 70% të tyre është ushtruar më shumë se një lloj dhune dhe 30% kanë pësuar një lloj të caktuar dhune. Në shumicën e rasteve, dhuna fizike dhe ajo ekonomike janë shoqëruar edhe me lloje të dhunës psikologjike si: kërcënime, izolime, detyrime, zhvlerësim moral dhe social etj.", - theksohet në studimin e qendrës "Vatra". Shumica e përfitueseve që kanë kërkuar shërbime kanë qenë të martuara, konkretisht 91 përfituese ( 43%). Më pas vijojnë përfitueset e divorcuara me 36% dhe numrin më të vogël e zënë përfitueset, të cilat kanë humbur bashkëshortët e tyre, vetëm 2% prej tyre. Krahasuar me vitin 2016, janë shtuar rastet e viktimave të dhunës, të cilat janë beqare, duke qenë se është rritur niveli i ndërgjegjësimit dhe janë më të hapura për të denoncuar dhunën që kanë pësuar.
DHUNA NDAJ FËMIJËVE
Fëmijët e përfitueseve janë mbështetur me shërbime psikologjike, duke qenë se shumica prej tyre raportojnë se kanë përjetuar dhunë psikologjike dhe fizike nga dhunuesi i nënës së tyre. Gjithashtu, ata kanë qenë dëshmitarë të dhunës së ushtruar. Dhuna emocionale ka qenë e pranishme pothuajse tek të gjithë fëmijët, dëshmitarë të dhunës në familje. "Është vënë re një rritje e numrit të viktimave të dhunës, të cilat janë dhunuar nga babai, konkretisht 60 prej tyre. Rreth 41% e viktimave të dhunës janë dhunuar nga partnerët e tyre si bashkëshorti, ish- bashkëshorti, bashkëjetuesi, partneri intim. Ndër dhunuesit, përqindjen më të lartë e zë bashkëshorti, rreth 75%. Ndër përfitueset e intervistuara, 13 prej tyre raportojnë se janë dhunuar nga nëna, 15 prej përfitueseve raportojnë se janë dhunuar nga rrethi familjar, ku përfshihet vjehrri/ vjehrra, kunata/ kunati, xhaxhai ose mbesa ( 1 rast). 12 prej përfitueseve raportojnë
Niveli arsimor i viktimave të dhunës në familje është i ulët. Përqindjen më të lartë të nivelit arsimor e zë ai 8- 9 vjeçar, konkretisht me 44% të rasteve. Përqindjen më të ulët e zë arsimi i lartë me 3% ( 8 raste). Përsa i përket gjinisë mashkullore, ashtu si vitin e kaluar, 80% e tyre i përkasin arsimit 8- 9 vjeçar. Është e dukshme që viktimat e dhunës, ashtu si edhe dhunuesit, i përkasin një niveli të ulët arsimor.
PUNËSIMI
Pjesa më e madhe e përfitueseve e rehabilitimit nga qendra "Vatra" nuk kanë asnjë profesion ( 61%). Pjesa tjetër e përfitueseve, të cilat kanë një profesion, ( 26%) janë trajnuar për profesione të tilla si rrobaqepësia dhe parukieria. Profesione të tjera kanë qenë infermieria, mësuesia etj. Përsa i përket gjinisë mashkullore, gjithashtu numri më i madh i tyre nuk kanë asnjë profesion. Mungesa e punësimit përbën një nga faktorët kryesorë të vulnerabilitetit ndaj dhunës, gjë që shkakton një varësi ekonomike dhe sociale ndaj partnerëve që fitojnë të ardhura. Mbi 60% e përfitueseve raportojnë se nuk janë lejuar nga partneri i tyre që të punojnë. Pjesa tjetër e përfitueseve nuk janë punësuar, pasi nuk kanë asnjë profesion. Gjithashtu, duke qenë se nuk mbështeten nga asnjë person i afërt, nuk kanë mundësi për t'u kujdesur për fëmijët e tyre gjatë orarit të punës.
ORIGJINA
Shumica e përfitueseve të asistuara vijnë nga zonat urbane si Vlora ( 92% e rasteve), Fieri, Berati, Lushnja etj., konkretisht 191 prej tyre ( 90%) dhe vetëm 10% e tyre ( 21 raste) vijnë nga zonat rurale si Selenica, Novosela, Rradhima etj. Këto shifra nuk nënkuptojnë se dhuna është më e pranishme te përfitueset nga zonat urbane, por vërtetojnë faktin që përfitueset nga zonat rurale hasin vështirësi të shumta për të kërkuar ndihmë.