Hapet fushata "Voto 16", synon uljen e moshës së votuesve në zgjedhje

"CRCA Albania", kërkesë Kuvendit të Shqipërisë

Organizata

për të drejtat e fëmijëve dhe të rinjve në vend, "CRCA Albania", hapi dje fushatën "VOTO 16!". Nëpërmjet një peticioni të bërë publik mëngjesin e djeshëm, "CRCA" iu drejtua Kuvendit të Shqipërisë dhe të gjitha partive parlamentare, për të kërkuar uljen e moshës së votimit nga 18 në 16 vjeç. "CRCA Shqipëri", prej kohësh ka nisur konsultimet me adoleshentët dhe të rinjtë në të gjitha qarqet e vendit për këtë nismë. Në kuadër të mbështetjes së fuqizimit të pjesëmarrjes të adoleshentëve dhe të rinjve në vendimmarrje, një ndër kërkesat më të shpeshta që është shprehur gjatë konsultimeve ka qenë ulja e moshës së votimit në 16 vjeç. Sipas vetë të rinjve, kjo do të fuqizonte jo vetëm pjesëmarrjen dhe përfaqësimin politik të adoleshentëve dhe të rinjve, por edhe vendimmarrjen e tyre në të gjitha proceset ku vendoset për ta. Shqipëria ka eksperienca pozitive përsa i përket garantimit të së drejtës së votës. Vendi ynë është ndër vendet e para në Europë, që iu njohu grave të drejtën e votës, që në vitin 1920. E drejta e votës në moshën 16 vjeç njihet tashmë në shumë vende si: Austri, Gjermani, Amerikë, Skoci, Norvegji, Brazil, Argjentinë, Zelanda e Re, etj. Altin Hazizaj, në emër të ' CRCA' në bërjen publik të peticionit tha: "Ne ftojmë të gjithë adoleshentët dhe të rinjtë në të gjithë Shqipërinë, prindër, mësues dhe aktivistë të mbështesin Peticionin ' Voto 16', duke votuar në adresën www. crca. al/ sq/ voto- per16", - thuhet në njoftimin e organizatës. Prej vitesh në Europë ka një sërë lëvizjesh që kërkojnë uljen e moshës së votimit. Si Parlamenti Europian, ashtu dhe Këshilli i Europës po promovojnë përfshirjen e të rinjve dhe adoleshentëve në votime që në moshën 16 vjeç. Zhvilli- mi i vendeve, aksesi në arsim, teknologji, vendimmarje në komunitet dhe në shkolla i ka formuar adoleshentët mjaftueshëm për të marrë vendime për jetën, veten dhe interesat e tyre.