Deputetët gjermanë në selinë e LSI, Rama: Qeveria dialogon me krimin

delegacion i parlamentit gjerman me deputetë nga Komisioni i Ligjeve dhe i Mbrojtjes së Konsumatorit i kryesuar kryetari i komisionit Stephan Bradner takoi dje nënkryetarin e LSI- së, Luan Rama, ku ishin të pranishëm edhe deputetë të kësaj partie. Deputetët gjermanë u interesuan të dinin mbi situatën dhe zhvillimet politike në Shqipëri, mbi ecurinë e reformave dhe bashkëpunimin mes forcave politike parlamentare në Shqipëri. Zëvendëskryetari i LSI- së iu bëri të qartë deputetëve gjermanë se situata politike në Shqipëri dominohet nga konflikti ndërpartiak, nga mungesa e konsensusit, mungesa e transparencës dhe e tolerancës, nga raportet alarmante të krimit me qeverisjen, nga korrupsioni dhe arroganca e qeverisë. "Situata në Shqipëri është problematike dhe në kaos, reforma në drejtësi është e dështuar dhe në kolaps", tha z. Rama. Ai përmendi se, "është skandaloz fakti që Shqipëria është pa Gjykatë Kushtetuese dhe pa Gjykatë të Lartë. Në vijim Luan Rama duke iu përgjigjur interesimit të deputetëve gjermanë për mungesën e dialogut politik mes qeverisë dhe opozitës theksoi se qeveria ka zgjedhur të bashkëpunojë me krimin dhe jo me opozitën, mungon dialogu politik sepse qeveria bën dialog me kriminelët, ndaj pa u ndarë qeverisja me krimin dhe pa u vënë para ligjit të gjithë ata përfaqësues politikë me lidhje apo mbështetje kriminale, nuk rikthehet besimi qytetar tek institucionet dhe demokracia dhe qeveria asnjëherë nuk do të punojë për integrimin europian të vendit.