PS merr shumicën në KQZ, opozita mbetet me një anëtar
Parlamenti ka votuar me votat e socialistëve dy kandidaturat për anëtarë KQZ- je Balla, Bashës: Mund të propozosh dy emra
Mazhoranca e majtë ka mundur të mar rë shumicën në Komisionin Qendror të Zgjedhjeve. Kuvendi ka votuar dje vetëm me votat e deputetëve të majtë dy propozimet e ardhura prej Partisë Socialiste për dy vende vakante në institucionin qendror të administrimit të zgjedhjeve në vend. Bëhet fjalë për Bledar Skënderin dhe Rezarta Bitrin, të cilët tashmë kanë zënë vendet e dy anëtarëve të propozuar më parë nga PD në KQZ, respektivisht, Hysen Osmanaj dhe Vera Shtjefnit. Të dy kandidatët e votuar dje kanë marrë nga 74 vota, ndërsa me këtë veprim socialistët sigurojnë shumicën në KQZ, çka u krijon atyre mundësinë jo vetëm që të zhbllokojnë ngërçin e krijuar për shkak të kuorumit, por edhe të kenë mundësi që të diktojnë me votën e tyre vendimmarrjen e tij. Kjo, pasi tashmë të majtët kanë në këtë institucion plotë 4 anëtarë, Denar Bibën, Edlira Jorgaqin, Bledar Skënderin dhe Rezarta Bitrin. Ndërkohë që opozita në mënyrë faktike aktualisht ka vetëm një anëtar, Klement Zgurin, i cili është njëkohësisht edhe kryetar i KQZ- së. Ndërkohë që mbeten vakante dy vendet që mazhoranca ia ka lënë opozitës. Bëhet fjalë për vendin e mbetur vakant nga mbarimi i mandatit të Bledar Skënderit dhe atij të përfaqësuesit të LSI- së, Gëzim Velshnja, të cilëve gjithashtu u ka mbaruar mandati dhe që prej disa javësh nuk mund të paraqiten më në mbledhjet e KQZ- së.
OPOZITA
Veprimi i djeshëm i Kuvendi pritet të ngjallë debate të tjera politike, për vetë mënyrën e njëanshme që zgjodhi e majta për të marrë shumicën në këtë institucion. Kështu, të majtët morën të drejtën që të propozojnë kandidatët për dy vendet vakante që ligji ia jep mazhorancës, por që deri më tani i ka pasur e djathta që nga koha që ishte në qeveri. Ndërkohë që socialistët pretendojnë se kjo e drejtë u takon atyre tani që janë në shumicë. Nga ana tjetër, ata i kanë të lënë të djathtës pikërisht mandatin që deri pak më parë e mbante Bledi Skënderi, një mandat që i përkiste opozitës dhe mandatin që deri më tani e mbante një përfaqësues i LSI- së. Por dy ditë më parë, vetë kreu demokrat, Lulzim Basha duke folur për këtë çështje, theksoi se opozita po uzurponte KQZ- në duke i marrë opozitës një vend në KQZ. "Aprovimi i dy kandidaturave nga PS- ja përbën një shkelje të ligjit. PS- ja nuk ka të drejtë në kuadrin aktual ligjor që të propozojë dy kandidatura, por ka uzurpuar një kandidaturë të opozitës, që është një shenjë e degradimit total të pushtetit. Është kapje e paligjshme e KQZ- së dhe natyrisht që opozita nuk mund dhe nuk do të bëhet pjesë e kësaj. Vetë KQZ- ja në rëndësinë që ka në procesin zgjedhor është një pjesë e problematikës që ka prodhuar ky pushtet", u shpreh Basha.
PS
Por, këtij pretendimi i është përgjigjur dje nga foltorja e Kuvendit kryetari i grupit parlamentar socialist, Taulant Balla, i cili deklaroi se në total nga 4 vendet e mbetura vakante, opozitës i takonin dy, por jo ata që morën dy kandidatët e votuar nga parlamenti. "Lulzim, të takojnë dy kandidatura, jo një! Pra, nga katër vakanca të krijuara në Komisionin Qendror të Zgjedhjeve, dy kandidatura i takojnë mazhorancës dhe dy i takojnë opozitës, jo një. Nuk ta kanë shpjeguar mirë Lulzim të tutë; nga katër, ke gjysmat. Për sa i përket partisë që ka numrin më të madh të mandateve, në shumicë jemi vetëm ne, Partia Socialiste e Shqipërisë. Kjo do të thotë se të dyja vendet që i takonin shumicës parlamentare të legjislaturës së vitit 2009- 2013, tashmë i takojnë shumicës parlamentare të legjislaturës 2017- 2021. Dy ish- anëtarët e KQZ- së, Vera Shtjefni dhe anëtari tjetër janë dy anëtarë që kanë qenë propozime të Partisë Demokratike, automatikisht dy propozimet e reja i takojnë Partisë Socialiste", sqaroi Balla. Ndaj, ai i bëri thirrje Partisë Demokratike të sjellë dy kandidaturat e saj për anëtarë të KQZ- së.