"Balkan Contemporary Music Festival" nis edicionin e II
Balkan
Contemporary Music Festival" e nisi edicionin II me mbrëmjen e muzikës sllovene. Programi festivalit dëshmon respektimin e parimit mbi të cilin është themeluar, pra një festival, i cili do të krijojë hapësira të përbashkëta përfaqësimi për muzikën e kompozitorëve të vendeve ballkanike. Nata e muzikës sllovene u materializua në interpretimin e flautistit Matej Grahek dhe pianistit Luca Ferrini, një duo kjo, tashmë e konsoliduar, që përfaqëson muzikën e kompozitorëve sllovenë në mjaft festivale dhe koncerte të ndryshme në mbarë botën. Dhe besoj se një nga arsyet kryesore pse ky koncert vështirë se do të zvetënohet nga kujtesa e publikut pjesëmarrës, është pikërisht cilësia interpretative e artistëve të sipërpërmendur. Programi koncertit ishte konceptuar që në radhë të parë të paraqiste kompozitorë të rëndësishëm sllovenë, por edhe autorë botërorë, sikurse edhe vepra nga kompozitorë shqiptarë.
Cilësitë interpretative të duos sllovene u shpalosën prej notave të para të Sonatës Nr. 14 të kompozitorit polak, Robert Muczynski. Një vepër e konceptuar me disa kohë dhe që rezonoi, sikurse dëshmuan edhe d u a r t r o k i t j e t , mjaft mirë me pritshmëritë e të pranishmëve në sallë. Veprat e kompozitorëve sllovenë Pavle Merku dhe Aljoz Ajdic krijuan një atmosferë krejt tjetër dhe dëshmuan për bashkëjetesën e stileve të ndryshme në krijimtarinë muzikore sllovene, pavarësisht bashkëkohësisë së kompozitorëve. Në veprën e Ajdic, për flaut solo, u shpalosën më së miri cilësitë e flautistit Matej Grahek. Thjeshtësia me të cilën int e r p r e t o n t e pasazhe tejet të vështira të krijonin përshtypjen se flautisti këtë vepër e kishte ekzekutuar së fundmi, ndërkohë që siç u shpreh edhe vetë, kishte mbi 5 vite pa e shfletuar. Të njëjtat aftësi interpretuese, artistët sllovenë i konfirmuan edhe në veprat e kompozitorëve shqiptarë dhe kjo u vërejt prej notave të para të veprës së Hajg Zacharian. Në origjinë vepra e Zacharian është kompozuar për violinë e piano, por përshtatja për flaut dhe piano tingëlloi e freskët dhe po aq emocionuese sa varianti origjinal i veprës. Interpretimi korrekt dhe pasionant i duos Grahek- Ferrini i fali një jetë të re kësaj vepre, qëkurse përshtatja për këtë formacion ishte një premierë botërore e realizuar mirë artistikisht dhe interpretuar krejt natyrshëm.
"Points of View III"... e Dorian Çenes, e renditur e dyta në programin e koncertit menjëherë mbas veprës së Muczynski- t, të paraqiste një qasje estetike krejtësisht të ndryshme. Duoja e kishte trupëzuar veprën në mënyrë kaq or- ganike, sa të krijohet ideja se po e interpretonte për të disatën. "Points of View III" e kompozuar fillimisht për klarinetë dhe piano, paraqiste vështirësi të konsiderueshme teknike dhe interpretuese, përgjithësisht për instrumentin e flautit. Gjithsesi, të gjitha këto vështirësi u paraqitën thuajse inekzistente dhe tingëllimi, sidomos i bashkëtingëllimeve tek flauti, u realizua në mënyrë mjeshtërore dhe profesionale. Artistë ia dolën që të funksiononin si një trup i vetëm, duke krijuar e realizuar mjaft mirë kontrapunktin organik, sidomos përsa i përket përafrimit timbrik, një elementi ky kaq i rëndësishëm për këtë vepër.
"Hatching aliens" e Ian Clarke mbylli programin e koncertit të duos sllovene. Një zgjedhje kjo e zgjuar e artistëve, qëkurse vetë Clarke është flautist dhe ka ditur të krijoj pasazhe mjaft efektive për këtë instrument. "Balkan Contemporary Music Festival" në edicionin e tij të dytë është mbështetur nga Ministria e Kulturës dhe Bashkia e Tiranës, ndërkohë që do të vazhdojë rrugëtimin e tij me mbrëmjen e muzikës maqedonase, që do të mbahet date 8 nëntor në sallën e Universitetit të Arteve.