Kryeministri u ka kërkuar deputetëve që të mos komentojnë
Rama SMS deputetëve: Do t'i dalim zot vendit dhe Kushtetutës
Mazhoranca
nuk ka bërë gjatë mbrëmjes së djeshme asnjë koment lidhur me vendimin e Presidentit të Republikës për të mos dekretuar propozimin e Sandër Lleshit si ministër i Brendshëm. Pas vendimit të Presidentit Meta mësohet se kryeministri Rama ka kërkuar nga të tijtë që jenë të kujdesshëm dhe të mos bien preh e këtij debati. Mësohet se ai u ka nisur një mesazh deputetëve të vet dhe ministrave të kabinetit që të mos bëjnë asnjë koment rreth kësaj çështje. Mes tjerash, Rama shkruan se shumica e ka për detyrë t'i dalë për zot kushtetutës dhe qytetarëve, ndërsa politikën e cilëson si një lojë shahu, e cila nuk duhet harruar sipas Ramës. "Lutem asnjë lloj komenti askush për vendimin e Presidentit! Ne jemi shumica dhe ne kemi detyrën t'i dalim zot njerëzve, vendit, Kushtetutës me maturi dhe vendosmëri. Politika është shah, mos e harroni", thuhet në mesazhin e kryeministrit drejtuar deputetëve. Nëpërmjet këtij mesazhi kryeministri lë të kuptohet se presidenti me vendimin e tij ka shkelur Kushtetutën dhe se mazhorancës i del për detyrë të mbrojë atë. Gjithsesi për shkak se është precedenti i parë i refuzimit të një ministri, nuk dihet ende se cila është mënyra që ka zgjedhur presidenti për të shpallur refuzimin e dekretimit të Lleshit. Por pavarësisht kësaj, kryeministrit Edi Rama i duhet tashmë që të bëjë një propozim të ri dhe sa më parë, pasi nuk mund ta lërë qeverinë pa një prej anëtarëve të saj më të rëndësishëm. Natyrisht që emërimi i ministrit të ri të Brendshëm bëhet edhe më imediat për vetë faktin se bëhet fjalë për një nga dikasteret më të rëndësishme dhe të ndjeshme, siç është rendi publik.