Rama: Krisjen të mos ta çojmë në thyerje, s'e kam humbur besimin te Meta
Kryeministri ka deklaruar se Presidenti ka shkelur Kushtetutën me mosdekretimin e Lleshit "Nuk figuron gjëkundi kompetenca e refuzimit"
Kuvendi i Shqipërisë i thirrur në një seancë të jashtëzakonshme për shkak të skadimit të afateve kushtetuese, votoi me 75 vota pro dekretit të Presidentit të Republikës, Ilir Meta për lirimin nga detyra e ministrit të Brendshëm Fatmir Xhafaj. Ndërkohë që nga foltorja e Kuvendit, kreu i qeverisë, Edi Rama u shpreh i sigurt se presidenti kishte shkelur Kushtetutën me vendimin e tij për të mos e dekretuar Lleshin si ministër të Brendshëm. "Nuk figuron gjëkundi kompetenca e refuzimit të Kryeministrit, për sa kohë ky gëzon besimin e shumicës në parlament dhe po njësoj, të ministrave që gëzojnë besimin e kryeministrit", tha Rama në fjalën e tij. Në vijim të këtij argumenti ai u shpreh se nëse kjo mundësi do të ekzistonte atëherë atë do ta kishte përdorur edhe paraardhësi i Metës në Presidencë, në rastin e emërimit të Fatmir Xhafaj rreth dy vite më parë. "Kushtetuta nuk i njeh Presidentit të Republikës, as shprehimisht, as me nënkuptim, e lëre pastaj t'i ketë dhënë me ndonjë ligj të nxjerrë në pajtim me të, kompetencën për të refuzuar propozimet e kryeministrit për anëtarët e kabinetit qeveritar. Presidenti Ilir Meta ka formuluar një letër refuzimi, pa asnjë referencë kushtetuese apo ligjore", tha Rama në fjalën e tij. Ndaj ai u shpreh se ishte pikërisht presidenti ai që i ka nxjerrë mazhorancës një problem duke mos respektuar Kushtetutën.
PROBLEMI
"Që prej të shtunës mbrëma, ne kemi një problem me Presidentin e Republikës, ose më saktë, një problem, i krijuar nga Presidenti i Republikës, në punën tonë si shumicë qeverisëse. Kushdo ka të drejtën e vet të mos na besojë, të na kritikojë, të hidhet edhe përpjetë kundër nesh, po të dojë, por ama askush tjetër, përveç popullit sovran, as e ka dhe as e merr dot të drejtën të na pengojë në ushtrimin e mandatit tonë kushtetues. Kjo vlen edhe për Presidentin e Republikës", theksoi kryeministri. Rama u shpreh se është gati që të dëgjojë Metën në Kuvend apo në mbledhjen e grupit të PS, ndërkohë që tha se arsyet që i kishte thënë në takimin e së dielës ishin qesharake dhe shtoi se uron që e gjithë kjo histori të mos jetë me qëllim. "Mirë se të vijë zoti President dhe të na rrëfejë me dyer të mbyllura, apo të hapura, vetëm me ne, apo bashkë me gjysmën e familjes sonë politike, këtu në parlament, gjithçka që e ka mbajtur përbrenda, me shumë "Krisja në këtë rast nuk është personale, as politike. Krisja është kushtetuese dhe ne jemi këtu dhe si mishërim i vullnetit të popullit sovran mes dy raundeve zgjedhore, do të bëjmë çmos në radhë të parë për ta ngjitur. Uroj të gjejmë edhe nga ana e Presidentit të Republikës dëshirën dhe durimin për të mos ta çuar krisjen në thyerje"