Presidenti i KE, Basha: 4 votat e PD, pro propozimit të Merkel
Zgjedhjet në PE, kreu i PD me Weber, mesazh për shqiptarët dhe të ardhmen në BE Deputeti gjerman: Mirënjohje miqve shqiptarë
Partia Demokratike do të votojë për herë të parë një kandidat të PPE për president të Komisionit Europian. Kreu i demokratëve, Lulzim Basha, e bëri të ditur këtë fakt përmes një postimi në "Twitter". Basha, i shoqëruar nga Gert Bogdani dhe deputetja Albana Vokshi po merr pjesë në Kongresin e PPE në Helsinki. Basha, zbuloi se 4 votat e PD ditën e enjte do të shkojnë për gjermanin Manfred Weber, pjesë e CDU/ CSU të Merkel. "Në Asamblenë Politike të PPE EPPHelsinki miratuam kandidaturat e Weber dhe Stubb. Nesër, EPPCongress debati dhe të enjten zgjedhim kandidatin e PPE për president të Komisionit Europian. Si anëtare me të drejtë vote, 4 votat e PD janë për Manfred Weber e simotrës mike CDU/ CSU", shkruan kreu i Partisë Demokratike në "Twiter".
TAKIMI
Kreu i PDSH- së, Lulzim Basha, është shfaqur në krah të kandidatit të CDU/ CSU, Manfred Weber, i cili garon në PPE për të garuar më pas për postin e Presidentit të Komisionit Europian. Basha zgjodhi që përmes një video në "Facebook" të sjellë nga Helsinki mesazhin që Weber ka dhënë për popullin tonë dhe për Bashkimin Evropian. Në videomesazh, Basha shprehu hapur qëndrimin e tij dhe të PD- së pro zgjedhjes së Weber si kandidat për të garuar në zgjedhjet presidenciale të KE- së. "Jam këtu me Manfred Weber, me kreun aktual të grupit parlamentar të PPE në Parlamentin Europian. Një mik i madh i Ballkanit dhe i Shqipërisë, i cili ka punuar gjatë për vlerat dhe principet europiane në Shqipëri dhe në Ballkanin Perëndimor, duke mbështetur integrimin tonë në Europë, për demokracinë dhe sundimin e ligjit. Dhe jam i lumtur që qëndroj pranë tij sot, nesër dhe pasnesër, ku 4 votat e Partisë Demokratike të Shqipërisë do të shkojnë për kandidaturën e tij në krye të Komisionit Europian, për lidershipin e tij të fortë, për Europën, Ballkanin Perëndimor dhe për Shqipërinë në Europë", u shpreh Basha. Ndërkohë nga ana e tij, Weber falënderoi Shqipërinë dhe opozitën shqiptare për mbështetjen që i ka dhënë, ndërsa është shprehur se ai do të punojë fort për një Europë të bashkuar në Bashkimin Europian. "Unë jam tepër mirënjohës për këtë mbështetje, veçanërisht nga miqtë e Shqipërisë. Bashkë me mbështetjen tuaj do punojmë për një Europë, e cila ende nuk është një kontinent i bashkuar. Për këtë do punojmë dhe luftojmë. Për një Europë të bashkuar në Bashkimin Europian. Faleminderit për mbështetjen tuaj dhe le të punojmë tani për zgjedhjet", deklaroi Weber.