Thellohet kriza, Rama i propozon Metës sërish emrin e Lleshit
Kryeministri i ridërgoi presidentit kërkesën për dekretimin e ministrit të Brendshëm Kërkesa shoqërohet me një relacion shpjegues
Kriza kushtetuese dhe institucionale mes Presidencës dhe Kryeministrisë vazhdon. Palët jo vetëm që nuk kanë reflektuar, por me kokëfortësi kanë vijuar që të shkojnë edhe më tej në këtë përplasje të panjohur më parë mes dy prej institucioneve më të rëndësishme shtetërore në vend. Kjo, pasi kryeministri Edi Rama nuk ka lëshuar rrugë dhe në kuadër edhe të lojës së tij të "shahut politik" ka bërë lëvizjen e tij të radhës, duke i çuar Presidentit Ilir Meta sërish emrin e Sandër Lleshit për ta dekretuar si ministër të Brendshëm. Lajmin e bëri të ditur dje vetë Rama, nëpërmjet një postimi në rrjetet sociale ku lajmëronte se i kishte dërguar kreut të shtetit kërkesën për të dekretuar Lleshin si ministër. "Sapo kam rifirmosur për ridërgim kërkesën për dekretimin e Sandër Lleshit ministër i Brendshëm, drejtuar Presidentit të Republikës", shkroi Rama. Gjithashtu, ai bëri të ditur se ndryshe nga hera e parë dhe për t'i hequr çdo alibi Presidentit Meta, kjo kërkesë shoqërohet kësaj here edhe me një relacion shpjegues mbi kandidaturën e Sandër Lleshit, ku jepen shpjegime jo vetëm mbi formimin dhe punën e kryer prej tij, por edhe duke bërë një interpretim të ligjit themeltar të shtetit mbi detyrat që kanë palët në procesin e emërimit të një ministri. "Bashkëngjitur do t'i dërgohet presidentit edhe një relacion i detajuar shpjegues, në funksion të dekretimit të ministrit të Brendshëm", shprehet ndër të tjera Rama në mesazhin e tij. Në fakt, bëhet fjalë për një veprim të paralajmëruar prej eksponentëve të ndryshëm të mazhorancës dhe nga vetë ai gjatë intervistës së dhënë dy ditë më parë gjatë një emisioni televiziv. "Unë do t'i dërgoj presidentit dekretin, ku përsëri do i propozoj dekretimin e gjeneral Sandër Lleshit si ministër i Brendshëm me një relacion shpjegues edhe në traditën e krijuar nga presidenti që në rastin e negociatave me Greqinë, për të arritur në atë marrëveshjen e plotfuqishme ka çuar ftesa shumë serioze dhe të detajuara që e kanë ndihmuar për proces-
in. Në këtë traditë do t'i çojmë presidentit një shkresë shpjeguese të detajuar dhe do t'i japim mundës-
inë që të krijojë bindjen e plotë", bëri të ditur Rama. Ai gjithashtu shprehu besimin se me këtë informacion sh- tesë, kreu i shtetit nuk do të kishte asnjë arsye që të bënte sërish të njëjtin veprim si në rastin e parë, kur refuzoi të firmosë dekretin. Madje, Rama theksoi se nëse kjo do të ndodhte, atëherë kjo do të tregonte se presidenti do të kishte interesa apo axhenda të tjera. "Nuk ka një çështje themelore. Vetëm nëse presidenti ka një axhendë tjetër, dhe unë nuk kam arsye që të dyshoj që presidenti ka një axhendë të fshehtë, unë nuk mund ta besoj që presidenti është pjesë e një loje politike. Unë nuk kam arsye që ta argumentoj këtu që presidenti ka një prapavijë dhe këto janë të gjitha për të fshehur një plan më të gjerë në kuadër të një opozite të pashpresë dhe të dëshpëruar", u shpreh Rama.