Relacioni i kryeministrit për Metën: Ja pse duhet dekretuar Sandër Lleshi

Kërkesa

e re e kryeministrit Rama për dekretimin e Sandër Lleshit si ministër i Brendshëm është shoqëruar edhe me një relacion të gjatë shpjegues. Ndonëse nuk ka qenë praktikë e mëparshme, kreu i qeverisë ka zgjedhur kësaj here që t'i heq Presidentit të Republikës çdo argument për të mos e dekretuar. Burime nga qeveria thanë se në shkresën me dy faqe, kryeministri evidenton domosdoshmërinë për të pasur një Ministri të Brendshme funksionale në këto momente delikate, njësoj siç edhe janë shprehur partnerët ndërkombëtar të vendit tonë në disa mesazhe që kanë përcjellë këto ditë. "Kryeministri i Shqipërisë me përgjegjësinë kushtetuese për plotësimin e funksionit të mbetur vakant të ministrit të Brendshëm, në një fazë delikate dhe të rëndësishme të luftës kundër korrupsionit dhe krimit të organizuar si dhe në një moment të rëndësishëm për demokracinë e një vendi, siç është periudha përgatitore e organizimit të zgjedhjeve të lira dhe të ndershme, i drejtohet Presidentit të Republikës për të propozuar Sandër Lleshin, për t'u emëruar në detyrën e Ministrit të Brendshëm", mësohet se thuhet në relacion. Po ashtu, burimet bëjnë të ditur se në dokument evidentohet karriera e gjeneral Sandër Lleshit si dhe vlerësimet që ai ka marrë nga partnerët ndërkombëtarë. E në fund, Rama ripërsërit edhe njëherë vendosmërinë e qeverisë së tij për të vijuar luftën kundër krimit të organizuar dhe korrupsionit, ku roli i ministrit të Brendshëm është thelbësor. "Një ministri e Brendshme plotësisht funksionale është një element kyç për të siguruar vazhdimësinë e këtyre përpjekjeve e arritjen e rezultateve në sajë të një kontributi e bashkëpunimi institucional që janë thelbësore në këtë proces", thuhet më tej në këtë relacion.