Gashi dhe Gina fitojnë betejën me kryeprokuroren, Gjykata e Apelit Administrativ: Të kthehen në detyrë
"Urdhrat për pezullimin e tyre, jashtë kompetencave të Markut"
TIRANË - Pak muaj pas pezullimit nga detyra, Rovena Gashi dhe Dritan Gina kanë fituar betejën ligjore me kryeprokuroren Arta Marku, pasi dje Gjykata e Apelit Administrativ i ka rikthyer në detyrë. Mësohet se urdhrat për pezullimin e tyre, pas shqyrtimit nga Apeli kanë rezultuar jashtë kompetencave të kryeprokurores së Përgjithshme të përkohshme, Arta Marku. Dy prokurorët në fjalë ishin pezulluar nga detyra pas akuzës për "refuzim për deklarim", "fshehjes së pasurisë" dhe "deklarimit të rremë të pasurinë" nga Prokuroria e Durrësit. Ndërkaq, Apeli e rrëzoi vendimin e pezullimit. Por, pavarësisht vendimit të gjykatës, Rovena Gashi nuk mund të rikthehet në detyrë.
VENDIMI I APELIT ADMINISTRATIV
"Shfuqizimin tërësisht si të paligjshëm të Vendimit më Nr. 140 datë 11.05.2018 të Prokurores së Përgjithshme të Përkohshme, Arta Marku ' Për pezullimin nga detyra të Prokurores Rovena Gashi, në Prokurorinë e Përgjithshme të Republikës së Shqipërisë", deri në përfundim të hetimeve ose gjykimit të procedimit penal me Nr. 577/ 2018 të Prokurorisë pranë Gjykatës së Rrethit Gjyqësor Durrës.
2) Shfuqizimin tërësisht si të paligjshëm të Vendimit me Nr. 141 datë 11.05.2018 te Prokurores së Përgjithshme të Përkohshme, Arta Marku "Për pezullimin nga detyra të prokurorit Dritan Gina, në Prokurorinë pranë Gjykatës së Rrethit Gjyqësor, Tiranë", deri në përfundim të hetimeve ose të procedimit penal me Nr. 577/ 2018 të Prokurorisë pranë Gjykatës së Rrethit Gjyqësor Durrës.
3) Pezullimin e zbatimit të Vendimit me Nr. 140 datë 11.05.2018 dhe Vendimit me Nr. 141 datë 11.05.2018 të Prokurores së Përgjithshme të Përkohshme Arta Marku, deri në përfundim të shqyrtimit, me vendim të formës së prerë, të ankimit të bërë nga ana e prokurorëve Rovena Gashi dhe Dritan Gina ndaj këtyre urdhrave të paligjshëm.
Relatori: Amarildo Lasi. Dispozitivi: 1. Pranimin e padisë. 2. Shfuqizimin e vendimeve nr. 140, datë 11.05.2018 dhe nr. 141, datë 11.05.2018 të Prokurores së Përgjithshme për pezullimin nga detyra të prokurorëve Rovena Gashi dhe Dritan Gina.
3. Shpenzimet gjyqësore i ngarkohen palës së paditur, Prokuroria e Përgjiths- hme. 4. Kundër vendimit mund të ushtrohet rekurs përpara Kolegjit Administrativ të Gjykatës së Lartë, brenda 30 ditëve, duke filluar nga e nesërmja e komunikimit të këtij vendimi të arsyetuar. Data e shpalljes: 08- 11- 2018", thuhet në njoftim.