"Shullazi", Ambasada e SHBA- ve: Pas tij kush e ka radhën?
Dënimi, OSBE: Kriminelët në burg
TIRANË - Dënimi me 14 vjet burg i Emiljano Shullazit nga Gjykata e Krimeve të Rënda, e cila dha 55 vjet burg në total për anëtarët e bandës së tij ka pasuar me reagimin e disa ambasadave në Tiranë, mes të cilave ambasada e SHBA- ve, Britanisë së Madhe dhe ajo gjermane. Vendimi është mirëpritur edhe nga OSBE- ja. Në një reagim në rrjetet sociale, Ambasada e SHBA- ve thotë: "Dita e djeshme shënoi një hap domethënës përpara për qytetarët shqiptarë, që kërkojnë dhe meritojnë drejtësi të vërtetë nga sistemi i tyre gjyqësor. Ne u inkurajuam nga puna e prokurorëve shqiptarë, të cilët, duke u bazuar në prova, bindën gjykatësit e Krimeve të Rënda se një bos i krimit dhe kriminelë të tjerë e kanë vendin në burg. Përshëndesim shqyrtimin e kujdesshëm të këtij rasti. Vendimi i marrë është një fitore për sundimin e ligjit në Shqipëri. Qytetarët shqiptarë tani pyesin ' Kush e ka radhën'"? Dhe Ambasada e Britanisë së Madhe ka përshëndetur vendimin e gjykatave shqiptare për dënimin e bandës së Shullazit. "Ambasadori Duncan Norman mirëpriti vendimin e gjykatave shqiptare për të dënuar me 14 vite burg Emiljano Shullazin dhe dënimet e gjata të dhënat për bashkëpunëtorët e tij. Krimi i rëndë dhe i organizuar gërryen vazhdimisht ekonomitë, shkatërron jetët dhe dëmton komunitetet tona. Nuk duhet të ketë hapësira të sigurta që të veprojnë kriminelët e krimit të rëndë dhe të organizuar", tha ambasada në një postim në rrjetet sociale. Në lidhje me dënimin e grupit të Shullazit ka reaguar edhe ambasadorja e Gjermanisë, Susanne Schutz. Diplomatja gjermane shprehet se askush nuk mund të qëndrojë mbi ligjin, ndërsa i ka bërë apel drejtësisë shqiptare që të mos tërhiqet në burgosjen e elementëve kriminalë. "E kam ndjekur me vëmendje procesin ndaj 5 të pandehurve në çështjen ' Shullazi'. Askush nuk qëndron mbi ligjin, drejtësia shqiptare të vazhdojë të veprojë. Lufta kudër krimit dhe korrupsionit është detyrë e Shqipërisë në rrugën drejt Bashkimit Europian", ka deklaruar ambasadorja gjermane.
Ndërsa, në reagimin e OSBE- së thuhet: "Jemi të inkurajuar nga operacionet e muajve të fundit kundër krimit të organizuar dhe së bashku me qytetarët shqiptarë që respektojnë ligjin, presim të shohim më shumë arrestime dhe dënime të kriminelëve të rrezikshëm".