' Unaza e Madhe', Basha nxjerr dokumentet: Tri shkeljet e projektit
Veliaj: Shpellarë, deputetët e Saliut. Kreu i PD: Në krye të bashkisë, një fundërrinë "S'lejohet prishja e banesave pa bërë dëmshpërblimin"
Protestës së banorëve në zonën e "Astirit" në Tiranë, iu bashkua mbrëmë edhe kreu i opozitës, Lulzim Basha. Sipas Bashës, Partia Demokratike pas një hetimi disaditor nxjerrë në dritë disa fakte tronditëse. Pas takimit me protestuesit, z. Basha në deklaratën për mediat tregoi dy dokumente që sipas tij nuk lejojnë prishjen e banesave pa u marrë dëmshpërblimi. Konkretisht, VKM ' Proces legalizimi' e vitit 2011 tregon standardin ligjor të vendosur nga qeveria "Berisha", që pronarët e banesave në proces legalizimi të kompensohen me vlerë të plotë tregu, kur banesat e tyre preken nga projektet me interes publik. VKM ' Shpronësimet' e vitit 2012 provon që për projektin e Unazës së Madhe janë kompensuar me vlerë të plotë tregu edhe banesa që janë klasifikuar nga ALUIZNI në kategorinë "Proces legalizimi". Shkeljet sipas tij janë: "1 kemi të bëjmë me një propozim fantazmë. 2 - I projektuar në kushte antiligjore. 3 - Pa leje bashkiake". "Së pari, projekti është i paligjshëm pasi vjen nga një propozim i pakërkuar. Një inxhinieri i ka lindur në zemër të bëjë dhuratë një projekt për këtë pjesë të Unazës në shkelje totale të normave të projektimit, i përshtatshëm për autostrada. E dyta, është skema korruptive. 40 mln euro për 2 km me shtatë nënkalime dhe mbikalime. E treta, projekti duhet të miratohet nga pushteti vendor. Në kulmin e kësaj paligjshmërie, bashkia duhet të thoshte nuk do ta pranojë këtë projekt. Ka në krye një fundërrinë, i cili del dhe sulmon qytetarët me shprehje raciste, që tregojnë se plehrat e Sharrës janë më të pastra se shpirti i tij", deklaroi z. Basha. Kreu i opozitës, Lulzim Basha njoftoi dje se gjatë këtyre ditëve opozita ka hetuar dhe ka konstatuar shkelje në rastin e projektit të Unazës së Madhe. "Arsyeja e këtij takimi ishte për të treguar disa të vërteta për shkeljet ligjore, pasi e ligjshme është vetëm protesta e tyre. Pas një hetimi disaditor kanë dalë fakte tronditëse, pasi projekti është i pakërkuar, firma e ka paraqitur jashtë normave, pasi ky projekt është për autostradë dhe jo për këtë rrugë". Kreu i PD iu kthye deklaratave për Teatrin Kombëtar kur tha se, "e kam thënë është vijë e kuqe, por shtëpitë tek Unaza e Re janë dy herë vija e kuqe për kryeministrin". "Kam thënë po u prish teatri, nesër do prishen shtëpitë e shqiptarëve. Nuk ka pritur ky kryeministër që çdo gjë e bën të paligjshme. Ashtu si teatri është vijë e kuqe, këtu është dy herë vije e kuqe. Banorët kanë të drejtë "Ky është një projekt që është bërë sikur flitet për një autostradë, ndërkohë që është Unazë e një qytetit. Së dyti, ky është një projekt i paligjshëm, pasi zhvillohet në qytet dhe duhet të ishte marrë mendimi i pushtetit vendor. Do të jemi në krah të banorëve për këtë padrejtësi që po u bëhet. Nuk do të lejojmë që ata të nxirren në rrugë", tha kreu i PD- së.