Protesta, Meta: Institucionet të respektojnë të drejtat njeriut
Presidenti ka reaguar për protestën e banorëve të "Astirit" dhe kërkon dialog "Të gjitha ankesat të vlerësohen me transparencë"
Presidenti Ilir Meta kërkon vendosjen sa më parë të dialogut mes institucioneve shtetërore dhe banorëve të zonës së "Astirit", që protestojnë për prishjen e banesave dhe njësive të tyre tregtare, që preken nga projekti i zgjerimit të Unazës së Madhe. Nëpërmjet një reagimi të shpërndarë dje në mbrëmje nga Presidenca, kryetari i shtetit vë theksin te nevoja që të gjitha ankesat që kanë banorët të shqyrtohen me seriozitet nga institucionet shtetërore. "Presidenti i Republikës, Ilir Meta po ndjek me shqetësim dhe vëmendje situatën konfliktuale të krijuar në Tiranë mes qytetarëve dhe autoriteteve, për shkak të ndërtimit të Unazës së Re. Presidenti Meta bën thirrje për vendosjen e një dialogu dhe konsultimi mes qytetarëve dhe autoriteteve, me qëllim që të gjitha ankesat të vlerësohen me transparencë dhe përgjegjësi, me qëllim arritjen e një zgjidhjeje të drejtë dhe objektive", thuhet në reagimin e Presidencës për këtë çështje. Më tej, ai u bën të ditur strukturave shtetërore që të zbatojnë të gjitha parashikimet ligjore në zbatimin e këtij projekti.
"Presidenti Meta u bën thirrje të gjitha institucioneve të zbatojnë me përpikëri procedurat ligjore për hartimin, miratimin dhe implementimin e këtij projekti urban, në mënyrë që realizimi i tij të mundësojë një zgjidhjeje të drejtë për të gjithë qytetarët dhe interesin publik në tërësi", theksohet në këtë reagim. Gjithashtu, Presidenca bëri me dije se presidenti do të kërkonte jo vetëm sqarime, por edhe të gjithë dokumentacionin e nevojshëm për të parë se si janë zbatuar procedurat ligjore deri në këtë fazë të zbatimit të këtij projekti. "Presidenti Meta do t'u drejtohet institucioneve përgjegjëse për të marrë informacionin e duhur në lidhje me ndjekjen e procedurave të deritanishme për këtë çështje", nënvizon Presidenca. Gjithashtu, në fund të këtij reagimi ky institucion evidenton se të drejtat dhe liritë themelore të njeriut mbrohen nga Kushtetuta dhe ato duhet respektuar. "Të drejtat dhe liritë themelore të njeriut gëzojnë një mbrojtje të veçantë nga Kushtetuta e Republikës së Shqipërisë dhe të gjitha institucionet shtetërore duhet të tregojnë përgjegjshmëri në respektimin e plotë të tyre", mbyllet reagimi i institucionit të Presidentit të Republikës. Nga ana e saj, qeveria ka konfirmuar gjatë këtyre ditëve se është e vendosur që t'i shkojë deri në fund realizimit të këtij projekti, që sipas saj do të çlirojë trafikun në një nga segmentet më problematike të Tiranës. Ndërkohë që ka bërë të ditur se një pjesë e 317 familjeve që prek- en nga projekti dhe që i kanë pronat të regjistruara do të shpronësohen sipas parashikimeve që bën ligji, ndërkohë që pjesës tjetër që nuk i ka pronat të regjistruara, do t'i ofrohet bonus qiraje për 3 vite.