Kush ishte Mid'hat Frashëri dhe pse debatohet për të
Biri
i rilindësit të shquar Ab dyl Frashëri, lindi më 25 mars 1880 në Janinë. Kishte edhe pseudonimet Lumo Skëndo dhe Mali Kokojka. E njohu shumë pak të atin e tij dhe u rrit në kujdestarinë e xhaxhallarëve, Sami dhe Naim Frashëri. Patriot, njeri i ditur, Mid'hat Frashëri deri në vitin 1905, punoi në administratën turke. U aktivizua në politikën shqiptare në fund të shekullit XIX dhe u bë një nga figurat më të spikatura në politikën shqiptare. Mid'hat Frashëri ka qenë pjesëtar i klubit të Selanikut në Manastir, ka botuar "Kalendarin Kombiar", ka themeluar gazetën "Liria", revistën "Dituria", dhe ka qenë kryetar i Kongresit të Manastirit dhe nënkryetar i Komisionit të Alfabetit. Mori pjesë në Kuvendin Kombëtar të Vlorës më 28 nëntor 1912 si delegat i Përmetit, Elbasanit dhe Pejës dhe nënshkroi Aktin e Shpalljes së Pavarësisë.
Në qeverinë e Ismail Qemalit u emërua Ministër i Punëve Botërore. Në kabinetet e Turhan Pashë Përmetit ishte ministër i Punëve Botore dhe Post- Telegrafës. Ishte anëtar i delegacionit shqiptar në Konferencën e Paqes në Paris, në vitet 1919 - 1920. Në vitet 1926 - 1939 hapi në Tiranë librarinë "Lumo Skendo". I përndjekur nga regjimi komunist me akuzën si themelues i organizatës së Ballit Kombëtar, Mid'hat Frashëri në përfundim të luftës u vendos në Itali e më vonë në Londër, ku krijoi Komitetin "Shqipëria e Lirë". Mid'hati Frashëri nuk u martua. Varrimin e tij në SHBA e kanë organizuar përmes një ceremonie madhështore patriotët shqiptarë. Emri i tij ka hapur debat ndër vite, për shkak të rolit që ai ka pasur gjatë Luftës së Dytë Botërore. Së fundmi, historiani Marenglen Kasmi u shpreh se "shtrohet pyetja nëse mund të rivarroset në Shqipëri me ndere zyrtare një ish- bashkëpunëtor i nazizmit, pavarësisht meritave të tij të pamohueshme për shqiptarinë deri në vitin 1943? Këtu qëndron thelbi i diskutimit. A është antikomunizmi një vlerë përgjithësuese që zeron bashkëpunimin me nazizmin?". Kasmi shtoi se gjatë asaj kohe Frashëri nënshkroi një marrëveshje që konsistonte kryesisht në krijimin pas lufte të një konfederate greko- shqiptare, me kufij të vitit 1939, si edhe që në rast lufte, komanda e përgjithshme ushtarake do të ishte në dorë të Greqisë.