Dyshimi për mungesën e apelimit, KAS përballë Skënderbeut
Gjykata e Lozanës i kthen përgjigje televizionit "News24": Nuk ka asnjë apelim në program Korçarët reagojnë: Është e pavërtetë, kemi apeluar
Në një kohë kur të gjithë janë sy e veshë nga Lozana dhe në pritje të gjyqit përfundimtar mes Skënderbeut dhe UEFA- s në lidhje me pezullimin 10- vjecar nga Kupat e Europës, duket se gjërat diku kanë ngecur duke vënë në dyshim atë çka klubi kampion i Shqipërisë ka thënë deri më tani. Të paktën kjo është ajo që del nga e- mail që redaksia e ' SportNeës' ka shkëmbyer me sekretariatin e Tribunalit të Arbitrazhit Sportiv në Lozanë, shkalla e fundit e gjykimit të betejës disa vjeçare mes kampionëve të Shqipërisë dhe raportit të inspektorëve të UEFA- s, që përpiluan masën ekstreme për bardhekuqtë. Sikundër është shkruar dhe folur shpesh nëpër media, gjyqi përfundimtar pritej të bëhej në tetor, më pas u shty në dhjetor dhe së fundmi nga ana e drejtuesve bardhekuq u dha muaji janar si periudha kohore kur do të vihen pikat mbi "i". Por në një vëzhgim të shpejtë të seancave të programuara, rezulton se deri më 15 janar nuk ka asnjë çështje "Skënderbeu" në program. Kështu, kërkesës sonë drejtuarit sekretariatit të Gjykatës së Lozanës për të mësuar nëse ka një apelim dhe nëse mund të mësonim datën e një gjyqi të mundshëm, KAS iu përgjigj se Skënderbeu nuk ka apeluar fare: "Faleminderit për mesazhin tuaj dhe interesin për aktivitetet e Gjykatës së Arbitrazhit Sportiv. Duke parë të dhënat tona, nuk na shfaqet të kemi marrë ndonjë apelim sa i përket çështjes që ju përshkruani më poshtë". Kjo përgjigje e Gjykatës së Arbitrazhit Sportiv shton dhe më shumë dyshimet mbi këtë çështje, në një kohë kur presidenti i Skënderbeut Ardian Takaj i kontaktuar nga "News24" theksoi se klubi që ai përfaqëson e ka apeluar vendim e UEFA- s madje është përcaktuar dhe trupa gjykuese, por sigurisht nuk ka ende një datë. Gjithsesi një gjë është e sigurt, mes dy palëve njëri ka të drejtë. Deri tani, përgjigjja zyrtare e KAS i jep të drejtë këtij të fundit.
REAGIMI I SKËNDERBEUT
Pasditen e djeshme ka pasur zëra se Skënderbeu mund të mos e ketë apeluar në KASin e Lozanës çështjen e dënimit 10- vjeçar për të mos marrë pjesë në Kupat e Europës. Gjithçka ka nisur nga një komunikim elektronik që "News 24" ka pasur me sekretariatin e KAS- it, ku përgjigja e këtij të fundit ka qenë se nuk rezultonte të kishte një apelim të Skënderbeut. Klubi korçar ka reaguar zyrtarisht në lidhje me këtë çështje, duke publikuar letërkëmbimin e fundit me KAS- in me foto, ndërkohë që shpreh indinjatën për lajmet e fundit, duke akuzuar qarqe të caktuara për "luftë" kundër Skënderbeut. "Duke marrë shkas nga lajmi i shpërndarë në mediat online, KF Skënderbeu siguron opinionin publik dhe sportdashësit bardhekuq se klubi ka apeluar vendimin e UEFA- s në CAS dhe jemi duke pritur datën e seancës dëgjimore. Dokumenti i publikuar më poshtë i përket datës 29 tetor dhe është letër këmbimi i fundit mes palëve në proces, dokument i cili hedh poshtë pretendimin e mediave vizive dhe online se në CAS nuk ka një apelim nga KF Skënderbeu",- lexohet ndër të tjera në komunikimin e klubit kampion të Shqipërisë.