' Ngërçi', Meta dekreton Sandër Lleshajn ministër të Brendshëm
Dekretimi, Rama: Edhe kur krisjet janë të pariparueshme, ka rrugëzgjidhje Presidenti: Arsyet përse e vonova firmën time
Presidenti i Republikës, Ilir Meta, dekretoi mbrëmë Sandër Lleshajn ministër të Brendshëm. Dekretimi u firmos në limitet e fundit të afatit kohor, tri orë para skadimit të tij. Kjo ishte hera e dytë që emri i Sandër Lleshajt qëndronte në tavolinën e Metës për dekretim, pasi herën e parë e refuzoi. Më herët gjatë ditës së djeshme, Meta dekretoi nxjerrjen në lirim të oficerit me gradë madhore, gjeneral brigade, Sandër Lleshaj, duke i hapur kështu rrugën dekretimit të tij në postin e ministrit. Presidenti konfirmoi zyrtarisht se ishte pikërisht statusi i tij si ushtarak aktiv, që e detyronte të mos e dekretonte si ministër, për shkak të kufizimeve që Kushtetuta ka për këtë kategori. Dekretimi i Lleshajt vjen përpara përfundimit të afatit kushtetues 7- ditor, për t'u shprehur për propozimin e dytë të kryeministrit Edi Rama, për emërimin e Sandër Lleshajt. Vendimi për dekretim erdhi pas më shumë se dy javësh debate mes dy institucioneve, Kryeministrisë dhe Presidencës. Pas kësaj procedurë, Sandër Lleshaj do të bëjë betimin në Parlament. Presidenti Ilir Meta sqaroi mbrëmë në studion e emisionit "Zonë e Lirë" se përse vendosi të dekretonte Sandër Lleshajn në postin e ministrit të Brendshëm dhe nuk e bëri javën e shkuar këtë gjë. Presidenti bëri të ditur se vetëm ditën e enjte i ka ardhur kërkesa nga ana e ministres së Mbrojtjes, e cila i propozonte lirimin nga detyra të gjeneral Sandër Lleshit. Sipas tij, pas lirimit, Lleshit i hapet rruga për t'u dekretuar ministër. "Dje ( të enjten) kam gjetur shkresën zyrtare të ministres së Mbrojtjes, e cila kishte bërë propozimin për lirimin nga detyra si gjeneral. Nëse do ma kishin sjellë këtë
kërkesë që më parë, do ta kisha dekretuar. Kjo është një arsye e madhe, është arsye kushtetuese", deklaroi Meta.
REAGIMI
Kryeministri Edi Rama reagoi menjëherë pasi Presidenti Ilir Meta dekretoi Sandër Lleshajn si ministër të Brendshëm. Në një status në "Twitter", Rama shkruan se ky është një shembull kuptimplotë i faktit se edhe kur duket sikur krisjet janë
të pariparueshme a thyerjet të pashmangshme, ka gjithmonë një rrugëzgjidhje, nëse ka vullnet të mirë. "Dekretimi i Sandër Lleshajt ministër i Brendshëm, një shembull kuptimplotë i faktit se edhe kur duket sikur krisjet janë të pariparueshme a thyerjet të pashmangshme, ka gjithmonë një rrugëzgjidhje nëse ka vullnet të mirë. Ministri i ri, njeriu i duhur në vendin dhe kohën e duhur", shprehet z. Rama. Tashmë i preferuari i kryeministrit Rama do të jetë edhe zyrtarisht në krye të Ministrisë së Brendshme, pas votimit në Kuvend dhe betimit në Presidencë. Statusi i ushtarakut aktiv të Lleshajt ishte edhe pengesa kushtetuese për mosdekretimin e emrit të tij si min- Sandër Lleshaj u emërua zëvendësministër i Brendshëm, pasi nuk u dekretua herën e parë nga Meta, ndërsa presidenti pranoi ripropozimin e dytë të kryeministrit Rama për të dekretuar zotin Lleshaj si ministër të Brendshëm.
istër nga Presidenti Ilir Meta. Vetë kreu i shtetit e pati konsideruar si problematikë themelore kushtetuese propozimin për Lleshajn, për shkak të statusit të ushtarakut aktiv. Ndërsa pas zhdekretimit si ushtarak aktiv e firmosi emërimin e dekretit si ministër i Brendshëm. Sandër Lleshaj u propozua ministër i Brendshëm nga kryeministri Edi Rama në datën 27 tetor, pas dorëheqjes së papritur të Fatmir Xhafajt nga ky post. Pas mosdekretimit nga ana e Presidentit, kryeministri Rama e emëroi Sandër Lleshajn zv. ministër, por me kompetencat e ministrit. Tani zyrtarisht, Sandër Lleshaj do të mbajë postin e ministrit të Brendshëm.