Unaza e Re, protestuesit përplasen me policinë, gjashtë të arrestuar
ARRSH: Janë sqaruar 70% e banorëve, të vijnë te ne dhe të marrin shpjegime për punimet Banorët me flamur amerikan në duar: S'dorëzohemi
Protesta e banorëve të zonës së Astirit në kryeqytet u shoqërua dje me tensione dhe përplasje fizike me policinë. Banorët bënë thirrje kundër qeverisë dhe Bashkisë së Tiranës dhe, gjithashtu, kanë kërkuar dëmshpërblim 100% për banesat e tyre. Më pas, ata i kanë vënë zjarrin kazanëve të plehrave dhe janë konfrontuar me policinë. Disa protestues çanë rrethimin e kantierit të kompanisë për ndërtimin e Unazës së Re dhe u shoqëruan në komisariat. Në ditën e 16 të protestës së tyre banorët shprehen se do të mbrojnë shtëpitë e tyre, të cilat do të prishen për t'i hapur rrugë projektit të Unazës së Madhe. Banorët hoqën rrethimin në hyrje të Unazës së Re, por policia nuk i lejoi të bllokojnë sheshin. Tensionimi i situatës erdhi pas shoqërimit në komisariatin e policisë të 6 protestuesve. Mësohet se janë shoqëruar në komisariat protestuesit Gëzim Sadikaj, Edmond Frangu, Arben Qyrani, Armando Gishto, Shpëtim Billo, Paolo Ahmetcenaj, nën moshën 18 vjeç. Pas disa minutave, situata është normalizuar, por banorët deklaruan se nuk do të dorëzohen. FNSH ka marrë në ruajtje kantierin e Unazës se Re duke krijuar një gardh. Me flamur amerikan në duar dhe me thirrje kundër qeverisë dhe kryetarit të bashkisë Erion Veliaj, protestuesit kërkuan dëmshpërblim 100% të pronave të tyre. Deputetë të opozitës ndodhen sërish pranë protestuesve që kanë hedhur dhe kapsolla e fishekzjarrë. Protesta e banorëve është në ditën e saj të 16. Në mbështetje të protestës janë edhe deputetë të PD- së dhe LSI. Banorët e Astirit, kërkojnë dëmshpërblim për prishjen e banesave që preken nga projekti për ndërtimin e Unazës së Madhe. Ndërkohë mëngjesin e djeshëm nisi prerja e disa pemëve. Banorët që preken nga projekti thanë se nuk do të lejojnë fadromat t'i afrohen banesave të tyre, se ato do t'i mbrojnë me armë. "Si pemët kërkon të na presë dhe neve. Projekti le të bëhet, por në të dëmshpërblehemi me çmimin e tregut 100%. Ne kërkojmë atë që na takon me ligj, me Kushtetutën e Shqipërisë. Unë banesën time do ta mbroj me armë. Nuk ka
ngelur rrugë tjetër. Kjo ka shumë zgjidhje, por këta nuk pranojnë dialog",- tha një prej përfaqësuesve të banorëve.
REAGIMI
Autoriteti Rrugor Shqiptar njoftoi dje se rreth 70% e pronarëve të prekur nga projekti janë pritur në një takim nga kreu i Drejtorisë së Planifikimit Strategjik. 36 prej tyre kanë marrë përgjigje me shkresë zyrtare. Në një deklaratë për mediat, ARRSH kërkon nga banorët që të paraqiten pranë institucionit me dokumentet përkatëse për të marrë çdo informacion që u
nevojitet. "Autoriteti Rrugor Shqiptar i bën thirrje të gjithë banorëve të segmentit rrugor "Mbikalimi Pallati me Shigjeta, Unaza, Shqiponja, Loti 1, 2, 3", të cilët nuk kanë marrë ende kontakt me ARRSH- në, të paraqiten pranë institucionit të Autoritetit Rrugor Shqiptar dhe t'i drejtohen Drejtorisë së Planifikimit Strategjik dhe Operacioneve me të gjitha dokumentet përkatëse". Drejtoria e Planifikimit Strategjik dhe Operacioneve dhe Drejtori i Përgjithshëm kanë pritur dhe kanë sqaruar rreth 60- 70 % posedues të objekteve të
prekura nga projekti "Rehabilitim Mbikalimi Pallati me Shigjeta Unaza Shqiponja Loti 1, 2, 3. 36 prej tyre kanë marrë përgjigje me shkresë zyrtare nga ARRSH. Objektet që preken nga projekti "Rehabilitim Mbikalimi Pallati me Shigjeta Unaza Shqiponja Loti 1, 2, 3" janë 242, sipas verifikimeve paraprake të bëra nga grupet e punës. Pjesa tjetër e banorëve që nuk janë paraqitur ende pranë institucionit të ARRSH- së janë të lutur të paraqiten për të marrë çdo informacion që u nevojitet",- thuhet në njoftimin e ARRSH.