Durrës, paralajmërohet me bombë false drejtori i Përgjithshëm i Hekurudhave, Ani Dyrmishi
Ish- kreu i Hipotekës: S'jam i kërcënuar, të zbardhet ngjarja!
DURËS - Një pako e dyshimtë, e cila u gjet mëngjesin e djeshëm pranë vendparkimit të automjetit të drejtorit të Përgjithshëm të Hekurudhave, Ani Dyrmishi, rezultoi të ketë qenë një alarm fals për vendosje eksplozivi. Nga ekspertiza e kryer rezultoi se shishja me ngjyrë të errët nuk përmbante lëndë të tillë, por nitrat. "Sot rreth orës 08: 30, në lagjen nr. 4, në një parking mjetesh u konstatua një pako, e dyshuar si lëndë plasëse. Në vendin ku u gjet pako ishte parkuar mjeti tip ' Pasat' me targa AA 070 TP, në përdorim nga shtetasi A. D. me detyrë drejtor i përgjithshëm i Hekurudhave. Në momentin që ka lëvizur mjetin, ai nuk e ka konstatuar pakon e dyshimtë. Nga konkluzionet e para të ekspertëve antieksploziv, re- zulton se pakos së dyshuar i mungonin disa elementë për të qenë lëndë plasëse. Grupi hetimor po punon për sqarimin e rrethanave të ngjarjes. Materialet i kaluan Prokurorisë së Rrethit Gjyqësor Durrës për veprime të mëtejshme për veprën penale ' Kanosja për shkak të detyrës'", thuhet në njoftimin zyrtar të Policisë Vendore të Durrësit. Ndërkaq, në lidhje me ngjar- jen në fjalë ka reaguar edhe vetë kreu i Hekurudhave ( ish- drejtor i Hipotekës së Durrësit, Ani Dyrmishi. Ai deklaroi se nuk ka pasur kurrë kërcënime dhe se mjetin e parkon në vende publike dhe lëviz i lirë në qytet gjatë gjithë kohës.
DEKLARATA E DYRMYSHIT
"Sot, si qytetar i Durrësit, por edhe si person që mbaj funksion drejtues pranë Drejtorisë së Përgjithshme të Hekurudhës Shqiptare, çmoj të arsyeshme të sqaroj opinionin publik në lidhje me pasqyrimin në media të gjetjes së një lende, të dyshuar si lëndë plasëse në lagjen nr. 4 të qytetit të Durrësit, lagje ku unë banoj. Unë nuk disponoj vend parkimi privat, si rrjedhojë në përditshmërinë time, e parkoj mjetin në vende parkimi publik. Kurrë nuk jam ndjerë i kërcënuar. Kam ecur dhe vazhdoj të eci i lirë në qytetin tim gjatë gjithë kohës. Figura ime si qytetar, por edhe si drejtues i lartë i HSH, kurrsesi nuk lidhen me ngjarjen e sotme. Unë nuk kam asnjë konflikt personal apo konf- likt në lidhje me detyrën që unë mbaj, administrator i përgjithshëm në Drejtorinë e Përgjithshme të Hekurudhës Shqiptare. Gjatë ushtrimit të detyrës, kurdoherë jam mbështetur dhe do të vazhdoj të respektoj e zbatoj vetëm ligjin sot dhe në të ardhmen. Padyshim, nxis dhe pres nga organet ligjzbatuese të hetojnë e sqarojnë rrethanat e ngjarjes dhe të vihen përpara drejtësisë personat përgjegjës".