Qeveria "shurdhe" ndaj FMN- së, rrugë të tjera me pagesë
Rrugës së Kombit dhe autostradës TiranëDurrës, qeveria duket se po planifikon që edhe akset e tjera nacionale t'ia japë privatit për mirëmbajtje apo rehabilitimi. Në mbledhjen e djeshme të qeverisë, janë bërë disa ndryshime në vendimin e mëparshëm për koncesionet, i cili në fakt sjell lehtësira të tjera për biznesin privat, që përfshihet në marrëveshje koncesionare. Qeveria ka vendosur që nëse propozimi i pakërkuar konsiderohet i pranueshëm, autoriteti kontraktor mund të nisë procedurën për dhënien e kontratës nëpërmjet një procesi transparent dhe konkurrues. Në nenin 15 shpjegohet dhënia e bonusit për atë kompani që do të marrë një koncesion për mirëmbajtjen e rrugës. "Në rast pranimi të një propozimi të pakërkuar, përpara procedurës konkurruese, propozuesi ka të drejtë të përfitojë nga autoriteti kontraktor, i cili vendos për një nga format e mëposhtme të bonusit: një bonus për rezultatin teknikofinanciar të propozuar prej tij, deri në një maksimum prej 10% të vlerësimit maksimal të garës, që miratohet me vendim të Këshillit të Ministrave. Gjithashtu, vendimi parashikon edhe aplikimin e procedurës me publikim të projektit të tij, me qëllim përfitimin e ofertës më të leverdisshme ekonomike, pa ndryshuar projektin teknik". Gjithsesi, nëpërmjet këtyre ndryshimeve bëhet e mundur që jo domosdoshmërish ai që bën ofertën e pakërkuar të fitojë edhe koncesionin. Kjo, pasi tashmë në garë përfshihen edhe operatorë të tjerë ekonomikë, që mund të sjellin një ofertë më të leverdishme financiare për shtetin.