Letër nga burgu për deputetin demokrat: Do vritesh me snajper
Prokuroria nis verifikimet, Ervin Salianji: E prisja, do vazhdoj denoncimet "Do të të qëllojë një ish- polic shkodranë, i liruar dy vite më parë nga qelia"
Pak ditë më parë, në kulmin e shpërthimit të çështjes "Dako" dhe daljes së përgjimeve të prokurorisë për të pas operacionit "Vol- Vo 4", deputeti demokrat, Ervis Salianji ka marrë një letër kërcënuese në adresë të tij. "Do vritesh me snajper", shkruhej ndër të tjera në letrën e mbërritur në adresë të Salianjit më 31 tetor 2018 nga burgu i Fushë- Krujës, ku madje jepeshin edhe emrat e autorëve të supozuar. Letra ka mbërritur në adresën e Ervis Salianjit në selinë e PD- së nga një i burgosur i quajtur Agim, i dënuar me 24 vite burg për vrasje. Mësohet se ky i fundit i shkruante deputetit demokrat se do vritej me snajper nga një ishpunonjës policie, i quajtur Dorian Duli, 38 vjeç, me origjinë nga Parruca e Shkodrës, i cili ka qenë i dënuar, por është liruar nga qelia në 21 janar të vitit 2016. "Zoti Ervin, juve do qëlloheni me snajper nga 38- vjeçari Dorian Duli, ish- punonjës policie me origjinë nga Parruca Shkodër, i liruar nga burgu më 21.01.2016. Ky person në bashkëpunim edhe me anëtarë të bandës së Lulzim Berisha… me porosi edhe të Vangjush Dako…", shkruhet mes të tjerash në letër. Më pas, Salianji ka bërë denoncim në Prokurorinë e Përgjithshme dhe për dijeni dhe Shërbimit Informativ Shtetëror. Ndër- kaq, Prokuroria e Përgjithshme e ka kaluar çështjen tek Krimet e Rënda dhe po bëhen verifikimet për rastin. Në lidhje me rastin në fjalë ka reaguar deputeti i Partisë Demokratike. Në një prononcim për "News 24", Ervin Salianji tha se rasti po ndiqet nga institucionet dhe se e kishte parashikuar që mund të ndodhnin gjëra të tilla, por se do vazhdojë denoncimet.
"Ju keni marrë sot info për këtë çështje, por unë kam kohë që kam dijeni dhe nuk e kam gjykuar si çështje publike. Madje, bërja publike u jep pikë pikërisht këtyre formave të intimidimit apo intrigës që të ushtrohet presion nëpërmjet përdorimit të delikuenteve. Në dijeninë time, rasti po ndiqet nga institucionet. Personalisht të gjitha këto i kam parashikuar dhe nuk më bëjnë përshtypje, çfarëdo qoftë sajesë e qeverisë apo përpjekje delikuentësh. Nuk më bën asnjë përshtypje dhe siç mund ta keni ndjekur, kam vazhduar denoncimet e krimit edhe në majat më të larta të pushtetit", u shpreh deputeti i Partisë Demokratike.