Ruçi: Shtëpinë e ndërtova me duart e mia, por të zbatohet ligji

Kryeparlamentari, mesazh banorëve të "Astirit"

Gjatë

takimit të djeshëm me banorët e Libofshës në Fier, kryeparlamentari Gramoz Ruçi gjatë takimit me banorët e Libofshës në Fier u përcolli një mesazh banorëve të zonës së "Astirit" në Tiranë, të cilët protestojnë për banesat e tyre që do të shemben, pasi preken nga projekti i Unazës së Re. Ruçi u shpreh se e ndjen dhimbjen e tyre dhe se e di se ç'do të thotë të të prishet banesa, me apo pa leje, por ai bëri thirrje që të zbatohet ligji. Sipas tij, shteti do t'i dëmshpërbleje ata që i kanë banesat e legalizuara si dhe do të ndihmojë banorët që nuk kanë mundur ende ta legalizojnë. "Unë e ndjej fort se çdo të thotë të të prishet shtëpia, me apo pa leje, sepse jam një si ata… Jam fshatar, që edhe unë gjatë viteve të gjata të jetës kam bërë shtëpi me duart e mia dhe kimetin shtëpisë ia di ai që ka pak lekë dhe e bën vetë, por do t'u thosha: Miqtë e mi, gabimi që bëj unë dhe ti si familjar, e paguajnë fëmijët tanë, ndërsa gabimet që bën politika, e paguan e gjithë shoqëria. Dhe ata fatkeqësisht po paguajnë gabimet e politikës, të djeshme dhe të sotme. Sepse ata ndryshe flasin kur janë në pushtet dhe ndryshe kur janë në opozitë. Apeli im do të ishte: Kjo marri 28- vjeçare duhet të marrë fund. E dyta, asgjë nuk zgjidhet në rrugë jashtë ligjit dhe jashtë ligjit të së drejtës, por zgjidhet në bashkëpunim me institucionet dhe siç ka thënë shteti, do të shihen të gjitha objektet një për një. Ato që janë legalizuar do të dëmshpërblehen, ndërsa ato që nuk janë legalizuar do t'u gjendet zgjidhja dhe hapësira sa e lejon ligji. Qeveria e PS nuk mund të shkelë ligjin", u shpreh Ruçi.