77 mijë banesat pa leje, procedurat e reja për legalizim
Drafti përcakton se ASHK- ja regjistron ndërtimin pa leje brenda 60 ditëve Legalizimi mund të bëhet për 30 ditë me kosto shtesë
Qeveria ndryshon pro cedurën dhe kriteret për legalizimin e 77 mijë ndërtimeve pa leje që deri më tani kanë mbetur pa u ligjëruar. Nëpërmjet projektligjit për "Përfundimin e proceseve kalimtare të kalimit të pronësisë", ekzekutivi i jep dhe një mundësi tjetër të gjithëve atyre që për shkaqe apo arsye të ndryshme nuk kanë mundur ta legalizojnë banesat apo ndërtimet e ndërtuara pa leje, në tokë të një tjetri apo edhe në tokën e tyre. Natyrisht që në fillim nëpërmjet këtij drafti bëhen të ditura rastet kur ndërtimet pa leje përjashtohen nga legalizimi. Më konkretisht ligji përcakton se nuk mund të legalizohen ato ndërtime që janë pranë veprave kryesore të infrastrukturës publike, akseve rrugore kombëtare, territorit të ndërtesave publike, pranë monumenteve të kulturës, territore e destinuara për investime strategjike, si dhe vijës bregdetare. Ndërkohë që për objektet me shkelje të lejes së ndërtimit, kriteret e mësipërme sjellin përjashtimin nga legalizimi vetëm për sipërfaqet në tejkalim të lejes së ndërtimit, kur ato janë të ndashme nga ndërti- mi kryesor ( ndërtimi me leje). Në rastin kur këto sipërfaqe nuk janë të ndashme, objektet me shkelje të lejes së ndërtimit legalizohen në tërësi. Pavarësisht faktit se shteti merr përsipër ta legalizojë një ndërtesë, në këtë ligj ai distancohet nga përgjegjësia për qëndrueshmërinë e strukturës së tij dhe të një fatkeqësie të mundshme. Sipas këtij drafti, Agjencia Shtetërore e Kadastrës, brenda 60 ditëve, nga përfundimi i procedurave të kualifikimit, legalizon ndërtimin. Ndërkohë që poseduesi i ndërtimit pa leje ka të drejtë të kërkojë përfundimin e procedurave administrative brenda 30 ditëve, nga paraqitja e kërkesës, kundrejt pagesës së një tarife shërbimi shtesë.