Në "sitë" gjyqtari i Apelit të Shkodrës, KPK: Luan Dervishi, kontakte me krimin
TIRANË - Komisioni i Pavarur i Kualifikimit ka thirrur dje në dëgjesë gjyqtarin e Gjykatës së Apelit Shkodër, Luan Dervishi, i cili njëherësh është edhe kandidat për Këshillin e Lartë Gjyqësor.
Trupi gjykues është i përbërë nga Etleda Çiftja, Firdes Shuli si dhe Pamela Qirko. Duke iu referuar deklarimeve të tij dhe verifikimet të kryera nga KPKja do të vendoset në lidhje me fatin e gjyqtarit Derivishi nëse do të vijojë punën në drejtësi ose jo. Komisioni duke iu referuar të dhënave të deklaruar nga vetë gjyqtari në ILDKPI, thekson se gjyqtari i Gjykatës së Apelit në Shkodër ka bërë deklarim të pasaktë të pasurisë, ndërsa nga të dhënat e tjera të siguruara nga DSIK- ja theksohet se ai rezulton të jetë i përfshirë në afera korruptive. Sipas KPK- së, gjyqtari Dervishi ka patur kontakte me persona të përfshirë në krim. Gjithashtu, siç njofton KPK- ja, theksohet se Dervishi disponon një truall 365 m ² në bashkë- pronësi me persona të tjerë në zonën e Selitës në Tiranë. Pas verifikimeve mbi aktivitetin e gjyqtarit, Komisioni i Pavarur i Kualifikimit nënvizon fak- tin se ka mospërputhje me mënyrën se si e fitoi truallin, pasi gjyqtari nuk ka paraqitur dokumente që të justifikojë pronën.
Gazetarja Klodjana Lala ka raportuar për "BalkanWeb" se pas dëgjesave të zhvilluara ditën e sotme, e hënë do të jetë dita kur trupa gjykuese do të japë vendimin përfundimtar për gjyqtarin e Apelit të Shkodrës. Sipas saj, gjyqtari Dervishi ka hedhur kandidaturën në muajin shtator për vakancën në Këshillin e Lartë Gjyqësor. "Në shtator të këtij viti Luan Dervishi ka kandiduar për KLGJ. Ai rezulton me problematika në pasuri, ka mospërputhje mes deklaratave të tij. DSIKja ka deklaruar se ai ka kontakte me persona të përfshirë në krim. Vendimi do të jepet ditën e hënë. Jemi në fazën finale për këtë proces nëse mund ta them kështu.", tha Lala. Gjyqtari u bë pjesë e listës së dytë të kandidatëve për Këshillin e Lartë Gjyqësor, pas vakancës shpallur për një pozicion nga Gjykatat e Apelit jashtë Tiranës. Ai e ka mbaruar Fakultetin e Drejtësisë në vitin 1985 dhe para se të emërohej gjyqtar në Gjykatën e Apelit të Shkodrës ka punuar si inspektor pranë Këshillit të Lartë të Drejtësisë.