Ultrasit e Lacios shpalosin banderolë pro- Kacifasit
Ngjarja e turpshme ndodh në Lacio- Milan, ultrasit bardhekaltër përkujtojnë terroristin grek Te Lacio është drejtor Tare dhe luan Strakosha
Në ndeshjen më të fortë të javës së 13të të kampionatit italian, atë midis Lacios dhe Milanit ka ndodhur një situatë e papritur nga ana e tifozëve lacialë. Ata kanë hapur një banderolë me mbishkrimin e emrit të terroristit grek Konstantinos Kacifas. Kjo banderolë shkaktoi shumë pakënaqësi, sidomos nga pala shqiptare, të cilët e quajtën një provokim të hapur këtë gjest, që është krejtësisht e panevojshme dhe e pakuptueshme, për më tepër se ka ndodhur në një kampionat të nivelit të lartë siç është Seria A. Kujtojmë që pak javë më parë, Kacifas u kthye në shkaktar të një situate jo të mirë nga ana politike midis Shqipërisë dhe Greqisë, teksa ekstremisti grek u ekzekutua nga polica shqiptare, pasi hapi zjarr ndaj tyre. Tashmë kjo gjë po ndodh edhe në stadiume, pasi në stadiumin e kryeqytetit italian lejohet që të hapet një banderolë e tillë, ndoshta edhe raciste. Kjo, pasi ngjarja e ndodhur nuk ka të bëjë fare me sfidën e zhvilluar në kampionatin italian. Në mediat italiane e cilësuan si një provokim kundrejt dy shqiptarëve që janë pjesë të skuadrës së Lacios, respektivisht Igli Tare ( drejtori teknik i klubit) dhe Thmoas Strakosha ( portieri i parë i të kaltërve). Një gjë është e papranueshme, se si autoritetet italiane e lejojnë që kjo banderolë jo vetëm të depërtojë në stadium, por edhe të shpaloset në sy të mijëra spektatorëve. Nga kjo foto dallohet qartë që tifozët që e kanë shpalosur këtë banderolë, janë tifozë grek që kanë qenë të pranishëm mbrëmjen e djeshme në stadiumin "Olimpiko" të qytetit të Romës, pasi përkrah banderolës së shpalosur, mbanin edhe flamurin grek. Ngjarja në fjalë vjen menjëherë pas zhurmës së madhe që krijoi shpalosja e një mesazhi kundër Kacifasit nga ana e tifozërisë së Partizanit, çka solli reagimin e kryeministrit Edi Rama, Presidentit Ilir Meta, Federatës Shqiptare të Futbollit dhe shumë personazheve të tjera, ndërsa prej më shumë sesa dy ditësh, kjo banderolë e dytë po kalon në heshtje.