Opozita rrezikon mandatet, nëse s'kthehet në Kuvend brenda dhjetorit
Deputetët e PD dhe LSI kanë qenë për herë të fundit në parlament më 19 korrik Berisha dhe Basha, mes 28 deputetëve që rrezikojnë
Afro gjysma e deputeteve të opozitës mund të humbasin mandatin, nëse brenda dhjetorit nuk shkojnë qoftë edhe një herë të vetme në parlament. Kjo, pasi ata kanë thuajse 5 muaj plot që bojkotojnë çdo aktivitet parlamentar dhe për rrjedhojë rrezikojnë të preken nga përcaktimi që bën Kushtetuta që mandati i deputetit mbaron apo është i pavlefshëm kur mungon pa arsye për 6 muaj resht në Kuvend. Janë plot 28 deputetë të PD, LSI e partive të tjera aleate, të cilët për herë të fundit kanë qenë në parlament në 19 korrik e pikërisht në 19 janar mbushin 6 muaj që ata mungojnë në Kuvendin e Shqipërisë. Kjo, duke iu referuar pikërisht procesverbaleve të Kuvendit të Shqipërisë për pjesëmarrjen në seanca plenare apo në komisionet parlamentare. Ndaj, këta deputetë që të mos preken nga përcaktimet që bën Kushtetuta duhet të ishin të pranishëm brenda datës 19 janar. Por në këtë rast, deputetët demokratë nuk i favorizon mbyllja e këtij sesioni parlamentar në dhjetor dhe nisja e sesionit të ri në janar. Kjo, pasi Rregullorja e Kuvendit thotë se sesioni i parë vjetor i punimeve të Kuvendit nis të hënën e tretë të janarit. Çka do të thotë se sesioni i ri i vitit 2019 nis më 21 janar, pra gati 3 ditë pasi deputetët opozitës mbushin plot 6 muaj që nuk shkojnë në Kuvend. Por, se duket më i rrezikuari është nënkryetari i PD- së, Edi Paloka, i cili pjesëmarrjen e fundit në Kuvend e ka pasur më 5 korrik. Gjithsesi, edhe ai nisur nga fakti se Kuvendi është pushim, do duhet që të rikthehet në Kuvend brenda dhjetorit, ashtu si edhe kolegët e tjerë në mënyrë që të mos i digjet mandati. Ndër shumë deputetë, në rrezik për djegie mandate janë edhe drejtuesit dhe figurat kryesore të PD- së dhe LSI- së, si Lulzim Basha, Sali Berisha dhe drejtuesja e LSI- së, Monika Kryemadhi. Por mes deputetëve, ka një sërë syresh të cilëve nuk i cenohet mandati, pasi kanë qenë pjesë e komisioneve parlamentare apo të Këshillit të Legjislacionit, siç ishte rasti i kësaj të mërkure të deputetëve Oerd Bylykbashi, Enkeljed Alibeaj, Gent Strazimiri, Nasip Naço, Edmond Haxhinasto dhe Silva Caka. Ndërkohë që koha ecën, opozita duket se nuk është ende e gatshme për të marrë një vendim përfundimtar lidhur me këtë çështje. Kështu, kryetari i demokratëve, Lulzim Basha ka anashkaluar diskutimin për mandatet, ndërsa ka folur gjithmonë për krizë politike, e cila merr fund me miratimin e vetingut në politikë. Ndërkohë që aleatja e tij, Monika Kryemadhi vetëm pak ditë më parë deklaroi se opozita nuk do i djeg mandatet. "Unë mandatin e kam marrë me gjak. Nuk e lë Edi Ramën që të bëjë ç'të dojë. Nuk është problemi te mandati im. Por hyj prapë unë, i fus një të votuar dhe dal prapë. Po ashtu nuk quhet bojkot. Ne jemi me shqiptarët. Mandati është i imi dhe jo i Edi Ramës, nuk ma heq dot mandatin ai mua. E djeg unë atë me kuç e me maç, me gjithë kriminelët", u shpreh Kryemadhi gjatë një interviste televizive.