Lul Berisha përballet në gjyq me atentatorin Ahmet Ajeti nga Kosova
Ngjarja në gusht të vitit 2005, kosovari u dënua me 20 vite burg në mungesë
Lulzim Berisha është përballur dje në pro cesin gjyqësor që po zhvillohet në Gjykatën e Krimeve të Rënda me personin që vite më parë ka tentuar ta vrasë. I shoqëruar nga avokati mbrojtës, Detar Hysi, Lulzim Berisha u paraqit në sallën e gjyqit në procesin ndaj 35- vjeçarit Ahmet Ajeti, i akuzuar si organizator i atentatit ndaj tij. Ngjarje kjo e ndodhur tri vite më parë. Në seancën gjyqësore të radhës, Berisha nuk ka pranuar të dëshmojë me pretendimin se vjen si i dëmtuar në proces. Ahmet Ajeti akuzohet se më 30 gusht të vitit 2005 ka bërë një atentat për vrasjen e Lulzim Berishës. Ajeti është dënuar në mungesë me 20 vjet burg për tentativë vrasjeje, ndërsa u ekstradua nga Lipjani i Kosovës, në Shqipëri 4 muaj më parë. Pas ekstradimit, ai kërkoi rihapjen e çështjes dhe rishqyrtimin e dosjes në prani të tij. Proceset gjyqësore kanë dështuar disa herë te Krimet e Rënda, për shkak të mosparaqitjes së Lulzim Berishës. Sipas motrës së tij, ai nuk ishte në Shqipëri, por referuar të dhënave të sistemit TIMS, Berisha rezultonte brenda vendit.
ATENTATI
Më 30 gusht të vitit 2005, Ahmet Ajeti dhe O. K., të porositur nga shtetasit E. D. dhe A. C. kanë shkuar nga Tirana në Durrës për të vrarë Lul Berishën. Para se të kryhej atentati në afërsi të lokalit ku ndodhej Berisha, kosovari Ahmet Ajeti është konfliktuar me disa persona të panjohur dhe në grindje e sipër ka nxjerrë pistoletën, ku dhe është vetëplagosur. Ajeti ishte shpallur në kërkim ndërkombëtar nga Interpol Tirana më 07.03.2016, pasi Gjykata e Sh- kallës së Parë për Krimet e Rënda, Tiranë, me vendimin nr. 01 datë 16.01.2012, e ka dënuar me 20 vjet burg për veprat penale: "Vrasje me paramendim" dhe "Armëmbajtje pa leje". Si rezultat i bashkëpunimit të Interpol Tirana me Policinë e Kosovës, u bë i mundur arrestimi i tij në Kosovë, duke u finalizuar me ekstradimin e tij drejt vendit tonë. Ahmet Ajeti nuk është një emër i panjohur për drejtësinë shqiptare, pasi ai ka qenë pjesë e bandës së Endrit Dokles e Adriatik Colit. Pretendohet se është paguar me 80 mijë euro në vitin 2005 për të vrarë Lulzim Berishën.