Tabaku, apel Veliajt: Mos u fshih, por jepu zgjidhje banorëve të bulevardit
Banorët
e Bregut të Lumit protestuan sërish dje në mbrojtje të banesave të tyre, që preken nga ndërtimi i Unazës së Madhe. Ata kërkuan dëmshpërblimet nga shpronësimet për ndërtimin e bulevardit të ri. Në mbështetje të banorëve të kësaj zone ishin edhe deputetët e PD- së. Deputetja Jorida Tabaku, e cila ka qenë një nga mbështetëset e kësaj proteste, i bëri dje kryebashkiakut Erion Veliaj që të mos fshihet, por të vijë t'u japë zgjidhje banorëve të bulevardit. "U bëj thirrje të gjithë atyre deputetëve të Partisë Socialiste që kanë ardhur dhe u kanë premtuar se do ta vlerësojnë pronën e tyre. I bëj thirrje kryetarit të bashkisë të mos fshihet, por të vijë të ballafaqohet këtu me premtimet e tij. Këta njerëz, ashtu si unë, ashtu si Partia Demokratike, besoj ashtu si kryetari i bashkisë, duan që të vazhdojë të zhvillohet qyteti, por jo në kurriz të pronës së tyre. Këta njerëz duan që djersa dhe kontributi i tyre të vlerësohet. Këta fëmijë janë sot pasdite këtu, në këtë ditë të ftohtë dhjetori, ditë e shtunë, ndoshta duhet të ishin duke luajtur si të gjithë moshatarët e tyre, por kanë ardhur të protestojnë për shtëpitë e tyre. Ditën e hënë ne do të jemi prapë këtu, përsëri në orën 4. I bëjmë thirrje kryetarit të bashkisë që të sjellë përfaqësues, të vazhdojmë procesin e vlerësimit të banesave, të nxjerrim VKM- në dhe të trajtohen ashtu si 200 familjet e tjera, që janë trajtuar që nga fillimi i bulevardit. Këta banorë do të vazhdojnë të protestojnë deri kur prona e tyre të jetë e mbrojtur", deklaroi zj. Tabaku..