ARRSH: Ulet numri i objekteve që preken nga projekti i Unazës

Përfundon verifikimi i shtëpive në "Astir"

Autoriteti

Rrugor Sh qiptar, ALUIZNI, Zyra e Regjistrimit të Pasurive të Paluajtshme, IKMT dhe Bashkia Tiranë kanë përmbyllur fazën finale të konstatimit në terren të objekteve që preken nga projekti i rehabilitimit të Unazës së Madhe të Tiranës, segmenti Pallati me Shigjeta - sheshi "Shqiponja" dhe statusin e tyre ligjor nga ana dokumentare. Ndonëse puna në Unazën e Re është pezulluar, ARRSH njofton se ka përfunduar vlerësimi total i objekteve që preken nga projekti i Unazës së Madhe. Në njoftimin fillestar është bërë e ditur se 240 objekte do të shembeshin, por pas verifikimeve, numri është ulur në 195 objekte që do të preken nga ndërtimi i tri loteve. Prej tyre, 71 rezultojnë të jenë të pajisura me dokumentet e pronësisë, të cilat do të përfitojnë shpërblim sipas ligjit, ndërsa 124 objekte janë pa dokumente pronësie. Në deklaratën për mediat bëhet e ditur se ka edhe qytetarë, objektet e të cilëve preken pjesërisht nga projekt. Në 72 raste, ARRSH ka kryer piketimet në terren dhe për këto objekte është gjetur dakordësia me pronarët. Ndërsa pjesa tjetër do të vazhdojë të qëndrojë, me kusht që të garantohet konfirmimi nga inxhinierët konstruktorë për qëndrueshmërinë konstruktive të objektit. ARRSH njofton se ka autorizuar vetëm pezullimin e aktivitetit ndërtimor nga kompanitë për loti nr. 1, ndërsa institucionet shtetërore do të vazhdojnë normalisht aktivitetin edhe në këtë segment për hapjen e hapësirës për zbatimin e projektit.