Pengesat në kufi, reagon OMONIA: Skenar terrorist për të na shfarosur
Pas
përfundimit të cere monisë përkujtimore të 40- ave të të ndjerit Kostandinos Kaçifas, OMONIA i ka cilësuar terroriste masat e marra nga Policia e Shtetit përgjatë gjithë ditës së djeshme. Ndalimet në pikat kufitare dhe shoqërimin e shtetasve grekë nga ana e policisë shqiptare, OMONIA e ka komentuar si një përpjekje graduale për shfarosjen e minoritetit grek në Shqipëri. Nuk mungon edhe paralajmërimi se ata do të kërkojnë nga ndërkombëtarët marrjen e masave që qeveria të ndërpresë këto "praktika të rrezikshme". "Forca të shtuara dhe të përforcuara të policisë me grupe speciale të ardhura nga Tirana në stacionin kufitar të Kakavijës dhe Qafë Botës ( Mavromati) nuk lejuan numër të konsiderueshëm qytetarësh dhe kjo pa arsye të qenësishme, për të hyrë në Shqipëri. Arsyet janë pa bazë ligjore, ndërsa sjellja në zyrat e stacioneve kufitare i ka të gjitha ato cilësi të hetimit dhe më së shumti shkelin të drejtat e qytetarit, veçanërisht atyre të Bashkimit Europian, që janë plotësisht të sanksionuara përsa i përket lëvizjes së lirë. Posaçërisht denoncojmë se pengimi dhe refuzimi i hyrjes për pjesëtarët e MEG që kanë edhe nënshtetësi shqiptare përbën shkelje të patolerueshme të të drejtave të tyre themelore dhe plotësisht të sanksionuara. Qëllimi i gjithë këtij skenari terrorizimi është e lehtë të kuptohet dhe ka të bëjë jo thjesht me manipulimin e MEG, por me izolimin e tij esencial nga tokat amtare, me objektiv shfarosjen e tij graduale", thuhet ndër të tjera në reagimin e OMONIA- s.