Projektligji, vërtetësinë e lajmit të portaleve do e përcaktojë AMA
Pretendimet e qytetarëve për publikimet do shqyrtohen nga Këshilli i Ankesave Nuk do lejohet më kopjimi i lajmeve nga të tjerët
Mediat online apo të njohura ndryshe si webe do t'i nënshtrohen një regjimi të rreptë kontrolli për të mospublikuar më lajme të pavërteta apo të kopjuara nga webet e tjera. Qeveria ka hedhur për konsultim draftin e parë të projektligjit me anë të të cilit kërkon të përcaktojë rregullat mbi të cilat duhet të funksionojë media e re online, që ashtu si në gjithë botën, edhe në Shqipëri ka marrë një përhapje të madhe. Në fakt, rregullimi i këtij zhvillimi nuk do të bëhet me një ligj të veçantë, por nëpërmjet ndërhyrjeve në dy ligje ekzistuese dhe më konkretisht në ligjin "Për mediat audiovizive" dhe në ligjin tjetër "Për komunikimet elektronike". Sa i përket ndryshimeve në ligjin e parë ai tashmë me përfshirjen edhe të fushës së mediave që funksionojnë nëpërmjet internetit do të ndryshojë edhe titullin dhe do të bëhet "Për mediat audiovizive dhe elektronike", ndërsa përjashtohet nga fusha e zbatimit të tij vetëm media e shkruar. Kështu, drafti i paraqitur parashikon krijimin së pari, të një regjistri të ofruesve të publikimeve elektronike, ku janë të detyruar të regjistrohen të gjitha domenet e webeve me ". al" dhe ato të regjistruara jashtë vendit, si dhe ofruesit e shërbimit të publikimeve elektronike ( OSHPE). Sipas kësaj nisme ofruesi i shërbimit të publikimit elektronik, pra ai që zotëron një web duhet të sigurojë që publikimet të shfaqen në një mënyrë të vërtetë, të paanshme dhe objektive, të mos cenojë dinjitetin dhe të drejtat themelore të njeriut dhe të respektojë rregullat e etikës dhe moralit publik dhe të mos lejojë shfaqen e publikimeve që mund të nxisin vepra penale. Gjithashtu, një web duhet të respektojë të drejtat e autorit, pra të mos kopjojë lajme nga webet e tjera, si dhe ofrojë një dritare ku mund të bëhet ankesë për lajmin e publikuar. Sipas projektligjit webi është i detyruar të shqyrtojë brenda 24 orëve çdo ankesë të arsyetuar të paraqitur me shkrim nga çdo person për programet e publikuara prej tij. Nëse webi refuzon ankesën, ose nuk kthen përgjigje brenda 24 orësh nga marrja e saj, personi ka të drejtë të ankohet pranë Këshillit të Ankesave, i cili brenda 72 orësh nga depozitimi i ankesës, vendos mbi ankesën përkatëse. Këshilli i Ankesave, nëse çmon se ka shkelje, merr masat përkatëse, duke përfshirë sanksionet që përcakton ky projektligj. Në çdo rast Këshilli i Ankesave njofton me shkrim personin që ka paraqitur ankesën dhe OSHPE- në përkatëse mbi konkluzionet dhe masat. OSHPE- ja, pra portali publikon konkluzionin e Këshillit të Ankesave, kur ky konkluzion është në favor të personit që ka kryer ankesën, brenda 24 orësh nga marrja e njoftimit, në një mënyrë të njëjtë me atë të realizimit të publikimit, kundrejt të cilit është bërë ankesa. Këshilli i Ankesave, nëse portali nuk reagon për të përgenjështruar lajmin, merr masat përkatëse, duke përfshirë sanksionet nga gjobat administrative, Portali publikon konkluzionin e Këshillit të Ankesave, kur ky konkluzion është në favor të personit që ka kryer ankesën, brenda 24 orësh nga marrja e njoftimit, në një mënyrë të njëjtë me atë të realizimit të publikimit, kundrejt të cilit është bërë ankesa. bllokimi i internetit dhe mbyllja e webit. Por ky proces i shqyrtimi të ankesave dhe marrjes së masave ndaj portaleve shmang vendimin gjyqësor, duke i dhënë AMA- s rolin e një institucioni thuajse gjyqësor.