Dënimi i Emiljano Shullazit, reagon ambasada e SHBA- ve: Ne duhet të festojmë edhe vetë procesin
"Kjo duhet të ndodhë në një sistem drejtësie që vepron nën sundimin e ligjit"
Një muaj pas dënimit me 55 vite burg të Emiljano Shullazit dhe katër anëtarëve të bandës së tij nga Gjykata e Krimeve të Rënda është përshëndetur jo vetëm nga politika shqiptare, por edhe nga përfaqësia diplomatike e akredituar në Shqipëri. Ambasada amerikane ka reaguar sërish për këtë çështje, e cila përmes zv. ambasadorit në detyrë, Daniel Koski, është shprehur se të gjithë duhet të gëzojnë për procesin e drejtësisë. "Më 13 nëntor, Gjykata e Krimeve të Rënda dënoi Emiljano Shullazin dhe grupin e tij. Është e lehtë të gëzohesh për atë vendim, por ne duhet të festojmë edhe vetë procesin. Kishte diçka të thjeshtë dhe të thellë në atë proces, pavarësisht zhurmës që e rrethoi. Në fund, ishte diçka e zakonshme. Prokurorët paraqitën çështjen e tyre, gjykata e prezumoi të pandehurin të pafajshëm dhe lejoi një mbrojtje të fortë dhe gjykatësit dhanë vendimin bazuar mbi faktet dhe ligjin. I pandehuri ka gjithashtu të drejtën e apelimit. Kjo duhet të ndodhë në një sistem drejtësie që vepron nën sundimin e ligjit. Kjo duhet të na japë shpresë të gjithëve ne", thuhet në njoftimin e ambasadës së SHBA- ve, shpërndarë në "Facebook". Nuk është hera e parë që ambasada amerikane flet për çështjen "Shullazi". Një ditë pas dënimit të tij me 14 vite burg dhe konkretisht më 14 nëntor të këtij viti reaguan disa ambasada në Tiranë, mes të cilave ambasada e SHBA- ve, Britanisë së Madhe dhe ajo gjermane. Ndërsa, vendimi u mirëprit edhe nga OSBE. Në një reagim në rrjetet sociale, Ambasada e SHBA deklaroi: "Dita e djeshme shënoi një hap domethënës përpara për qytetarët shqiptarë, që kërkojnë dhe meritojnë drejtësi të vërtetë nga sistemi i tyre gjyqësor. Ne u inkurajuam nga puna e prokurorëve shqiptarë, të cilët duke u bazuar në pro- va, bindën gjykatësit e Krimeve të Rënda se një bos i krimit dhe kriminelë të tjerë e kanë vendin në burg. Përshëndesim shqyrtimin e kujdesshëm të këtij rasti. Vendimi i marrë është një fitore për sundimin e ligjit në Shqipëri. Qytetarët shqiptarë tani pyesin ' Kush e ka radhën'"?
DËNIMI I GRUPIT "SHULLAZI"
Pas afro 50 seancash gjyqësore ka marrë fund saga "Shullazi" në Gjykatën e Krimeve të Rënda. Në seancën e zhvilluar më 13 nëntor, kjo gjykatë dënoi me 14 vjet burg "kokën" e këtij grupi kriminal, Emiljano Shullazi. Ky i fundit u shpall fajtor për akuzat e gjobëvënies dhe krijimit të grupi të strukturuar kriminal, ndërsa u shpall i pafajshëm për akuzën e presionit dhe kanosjes ndaj dy rektorëve Mynyr Koni e Dhori Kule dhe atë të shkatërrimit të pronës, për vendosje tritoli biznesmenit Jani Zaka në Tiranë dhe Adriatik Kuçuku në Lushnje. Gjithashtu, trupa gjykuese e drejtuar nga gjyqtari Fran Prendi dha vendimet dhe për 4 anëtarët e tjerë të grupit në fjalë. Konkretisht, gjykata vendosi dënimin me 12 vite burg për Gilmando Danin, 10 vjet burg për Indrit Qyqjan, 10 vite burg për Indrit Zelën si dhe 9 vite për Blerim Shullazin. Gjykata dha një masë shtrënguese, që të pandehurit të mos përfitojnë nga e drejta e lirimit me kusht, ndërsa dënimin do e kryejnë në një burg jo të sigurisë së lartë. Në total, Gjykata e Krimeve të Rënda ka dhënë 55 vite burg për anëtarët e bandës, ndërsa prokuroria kërkoi 64 vite për 5 të pandehurit. Procesi gjyqësor u zhvillua nën masa të rrepta sigurie te Krimet e Rënda, ndërsa seanca u monitoruar nga përfaqësues të ambasadës amerikane dhe asaj gjermane. Trupit gjykues iu deshën rreth 3 orë e gjysmë për të marrë vendimin final për bandën e Emiljano Shullazit.
DËNIMET PËR GRUPIN "SHULLAZI"