Abuzimi me tenderët, gjykata liron dy ish- zyrtarët e Ministrisë së Drejtësisë
TIRANË - Gjykata e Shkallës së Parë e Tiranës ka liruar dje dy zyrtarët e Ministrisë së Drejtësisë, të cilët u arrestuan tri ditë më parë pas dyshimeve për shpërdorim detyre dhe shkelje barazie në 5 tenderë të zhvilluar përgjatë viteve 2016- 2017. Bëhet fjalë për drejtorin e Shërbimeve Mbështetëse në këtë institucion, Aurel Lamçe si dhe specialistin e IT- së, Arlind Alikajn, për të cilët është ndryshuar masa e sigurisë nga "Arrest me burg" në "Arrest shtëpie". Sipas argumentit të gjykatës, këta persona nuk kanë mundësi ikjeje apo të prishin provat dhe për këtë arsye duhet të zbutet masa. Të shtunën pritet të dalin për verifikimin e masës edhe ish- sekretarja e përgjithshme e Ministrisë së Drejtësisë, Juliana Hoxha dhe punonjësi i IT- së, Lysien Ali. Për arrestimin e këtyre personave reagoi edhe ministrja e Drejtësisë, Etilda Gjonaj. Ajo sqaroi se sulmi i ardhur drejt saj ditën enjte nga kryetarja e LSI, Monika Kryemadhi, ka lidhje pikërisht me këto arrestime. Për 8 zyrtarë të tjerë u caktua masa "detyrim paraqitje". Sipas prokurorisë, hetimet janë shtrirë në 5 tenderë si: ' Mirëmbajtja dhe mbikëqyrja e sistemit ICMIS në 7 Gjykatat Administrative', ' Përmirësimi i sistemit të mbikëqyrjes elektronike në fushën penale', ' Përmirësimi, zhvillimi dhe mirëmbajtja e Regjistrit Noterial Shqiptar', ' Sistemi i monitorimit me kamera për burgun e Lezhës dhe FushëKrujës' si dhe ' Përmirësimi dhe mirëmbajtja e sistemit elektronik të çështjeve të përmbarimit'. Hetimet kanë zbuluar faktin se përmes shpërdorimit të detyrës, zyrtarët i kanë shkaktuar shtetit një dëm të madh financiar. Në fokusin e prokurorisë ishin funksionarët publikë që kanë qenë pjesë e njësive të prokurimit, komisioneve të vlerësimit të ofertave dhe komisioneve për mbikëqyrjen e zbatimit të kontratave. Tenderët janë zhvilluar në kohën kur Ministrinë e Drejtësisë e drejtuan Petrit Vasili dhe Ylli Manjani. Prokuroria deklaroi se, nëse e sheh të nevojshme, do t'i thërrasë në pyetje edhe 2 ish- ministrat. Ndërkohë, zbatimet e kontratave kanë vijuar edhe në kohën që dikasterin e drejton, Etilda Gjonaj.