Sot zgjidhet “Miss Shqipëria 2019”, Arjola Shehu: Ja përjetimet e eksperiencës së re
Fytyra e moderatores së dashur për të gjithë mediat, do t’i rikthehet sërish ekranit! Arjola Shehu do të rikthehet në prezantim shumë më shpejt seç pritej. Ka qenë vetë ajo që ka zbuluar se i është besuar prezantimi i spektaklit të bukurisë “Miss Shqipëria 2019”. Spektakli që do të kurorëzojë më të bukurën shqiptare të këtij viti do të mbahet në kalanë e Libohovës, do të mbahet mbrëmjen e sotme. Shumë e lumtur për këtë bashkëpunim me autorëve dhe producentëve Petri Bozo dhe Alda Bida, Arjola ka shprehur mirënjohjen dhe lumturinë për këtë projekt që i është besuar. Në një rrëfim ekskluziv për “Bluetooth” të “Gazeta Shqiptare”, Arjola na tregon prapaskenat para mbrëmjes së madhe.
“Është një eksperiencë e re për mua të cilën po e shijoj minutë pas minute,” shprehet Shehu.
Siç duket edhe ky projekt e mban ish- prezantuesen e “Kush vjen për drekë” larg angazhimit në televizion, sepse pas përfundimit të programit të përditshëm në Tv Klan ajo është marrë me prezantim spektaklesh, siç ishte pak muaj më parë edhe “Netët
e Klipit shqiptar”. Le të shohim sonte se kush do të rrëmbejë kurorën e më të bukurës për këtë vit në Libohovë nën drejtimin e Arjola Shehut.
Eksperiencë pas eksperience, së fundmi lajmëruat se do të drejtoni “Miss Shqipëria 2019”. Si erdhi propozimi?
Një eksperiencë e re për mua të cilën po e shijoj minutë pas minute. Me Petri dhe Aldën patëm një bashkëpunim fantastik në festivalin “Netët e Klipit Shqiptar” dhe nga kjo kimi profesionale lindi edhe ky bashkëpunim i dytë për “Miss Shqipëria”.
Në 6 korrik keni mbrëmjen në Libohovë ku do të zgjidhni më të bukurën. Si i keni përjetuar prapaskenat për përgatitjet e bukurosheve dhe emocionet tuaja për finalen? Ka patur ndonjë të papritur?
Falë Zotit dhe punës së palodhur, të gjitha produksionet që bën Deliart shkojnë për mrekulli. Unë po e shijoj shumë, vajzat po ashtu. Emocionet janë të mëdha dhe të bukura njëkohësisht. Do bëjmë më të mirën tonë mbrëmjen e 6 korrikut, që edhe të papriturat t’i përballojmë sa më lehtë dhe me sportivitet, se live padyshim që ka tjetër ritëm edhe adrenalinë.
Cila është surpriza që rezervoni për mbrëmjen e sotme?
Ah, kemi shumë të tilla, performanca të veçanta, që publiku nuk i pret, juria e përzgjedhur me kujdes, po mbi të gjitha kurioziteti që na shoqëron prej javësh për të zbuluar me të bukurën shqiptare.
Si ishte eksperienca e përjetuar në “Netët e Klipit”?
E mrekullueshme, në çdo çast të shpenzuar për “Netët e Klipit Shqiptar” unë kam fituar shumë, kam mësuar shumë e kam përjetuar në mënyrën më të mirë të mundshme. Nëse do ju flisja për emocionet dhe përjetimet e natës finale pastaj, do me duhej shumë me shumë sesa vetëm një paragraf.
Pas gjithë impenjimeve do të ketë dhe pushime për Arjolën. Ku keni planifikuar t’i kaloni këto ditë të nxehta?
Ah, akoma jam e pavendosur. Besoj pushime jo fort larg Tiranës ose Shqipërisë, sepse më duhet të jem këtu për t’u marrë me të gjitha angazhimet e mija.
A keni në plan t’i riktheheni ekranit? A keni ndonjë projekt gati për në vjeshtë?
Këtë po jua lë surprizë! Megjithatë përpara se të arrijmë në vjeshtë, kemi përpara datën 6 korrik ku unë do ju pres në kalanë e Libohovës, për të shpallur në një mbrëmje të veçantë, më të bukurën e vajzave shqiptare, “Miss Shqipëria 2019”.