Ekonomia si ' minë me sahat'
tik ka akoma mëdyshje që kriza politike po na ' hedh në erë' ekonominë le t'i hedhim një sy disa prej statistikave të fundit të INSTAT- it.
Së pari, parë situatën në makro pritshmëritë nga prognozat e FMN ose BB, ishin që ekonomia jonë të rritej me 3.5% gjatë 2019, por në tremujorin e parë të vitit u shënua vetëm 2,21% rritje. Shifër zhgënjyese, që vjen nga tkurrja e prodhimit, sidomos në industrinë nxjerrëse. Sektori energjetik rezultoi 6,05% nën pritshmëri. E po ashtu, shihet që situata nuk është mirë pasi popullata po i kushton më pak kohë dhe para arteve, argëtimit duke pakësuar pjesën e buxhetit që ia destinonte këtij grupi me 20.13%. Pra, me pak fjalë jemi si në kushtet e ' luftës', jo jetë sociale, por përpjekje për të mbijetuar ( ushqim dhe siguri).
Në çdo rrethanë që ka tragjedi, ka edhe ironi. Ironia e fatit, në këtë situatën tonë është se 2 sektorët që mundësuan gati gjysmën e volumit të rritjes ekonomike dhe që ' nuk ua ndjen' se çfarë po ndodh në Shqipëri janë "Ndërtimi" me 0.43% dhe "Aktivitetit i Pasurive të Paluajtshme" me 0.51%. Ato rriten e rriten përditë, përpara syve tanë, pa u ndikuar nga askush e asgjë; pasi po të transformonim shprehjen e Kryeministrit tonë: "Shqiptarët kanë para, por nuk janë të aftë t'i shohin".
Treguesi i dytë, që mund të shohim është inflacioni që mbeti në nivelin 1.5% larg targetit të Bankës së Shqipërisë. Pagat në një situatë si kjo nuk kanë si të rriten me ritmet e kërkuara, e po ashtu goditje e madhe iu dha nga efekti prapaveprues i forcimit të kursit të këmbimit. Leku ynë zhvlerësohet me shpejtësi, njësoj si imazhi ynë.
E nëse edhe shifrat e paraqitura nuk bindin akoma, pavarësisht se dihet që shifrat janë ' kokëforte' të presim publikimet e Institutit të Statistikave apo institucioneve ndërkombëtare mbi tremujorin e dytë të 2019. Periudhë ku kriza u përshkallëzua, konflikti politik u zhvendos në rrugë, protesta u bënë të përjavshme, gazi lotësjellës ' zëvendësoi' hidrogjenin në atmosferën tonë, duke u bërë ' gazi' i botës.
Faktorë që shtrijnë padiskutim efektin edhe në sektorin turistik. Mezi i presim këto 3 muaj të sezonit për të përmirësuar sadopak bilancet shtetësore, por këtë vit duket se do të jenë jo të frytshme. Turistë të munguar, pushues të frikësuar, rezervime të anuluara, plazhe të boshatisur; e si rezultat ' arka' e qytetarëve dhe shtetit e rrënuar.